បើទោះបីជាការឈឺក្បាល ជាញឹកញាប់ត្រូវបានផ្សារភ្ជាប់ជាមួយនឹងការហូរឈាម ឬកកឈាមក្នុងខួរក្បាលក៏ដោយ ប៉ុន្តែការឈឺក្បាលនេះ វាក៏មិនតែងតែមានការកកឈាមដែរ។
(អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)
ភាគច្រើន រោគសញ្ញាដែលពាក់ព័ន្ធជាមួយនឹងការហូរឈាមក្នុងខួរក្បាល គឺអាស្រ័យទៅលើតំបន់ជាក់លាក់នៃខួរក្បាលដែលមានការប៉ះពាល់នោះ។ ប្រសិនបើការហូរឈាម ឬកកឈាមនោះ គឺស្ថិតនៅក្នុងផ្នែកមួយនៃខួរក្បាល ដែលត្រូវបានផ្សារភ្ជាប់ជាមួយនឹងចក្ខុវិស័យ នោះវានឹងអាចបង្កឲ្យអ្នកមានបញ្ហាក្នុងការមើល។
(អាន:ថ្នាំងងុយគេង ពេលអ្នកគួរប្រើ)
វាក៏អាចកើតមានឡើងនូវបញ្ហាមួយចំនួនផងដែរជាមួយនឹងតុល្យភាព (លំនឹង) ការសម្របសម្រួល ការខ្សោយមួយចំហៀងខ្លួន ការស្ពឹក ឬការប្រកាច់មួយរំពេច។ វាក៏អាចប៉ះទៅលើមជ្ឈមណ្ឌលនៃការនិយាយផងដែរ ប្រសិនបើវាកកនៅទីនោះ ដែលវាអាចធ្វើឲ្យមានវិបត្តិក្នុងការនិយាយ (ប៉ះពាល់ផ្នែកខាងឆ្វេងនៃខួរក្បាល)។
ប្រសិនបើការហូរឈាមនោះ គឺនៅតំបន់ផ្នែកខាងក្រោមនៃខួរក្បាល ដែលភាគច្រើនបំផុតមានមុខងារទាក់ទងទៅនឹងការធ្វើចលនាដោយស្វ័យប្រវត្តិរបស់រាងកាយ អ្នកជំងឺអាចក្លាយជាព្រងើយកន្តើយ មិនដឹងអ្វី ឬអាចសន្លប់តែម្តង។
លើសពីនេះទៅទៀត ពេលខ្លះរោគសញ្ញានៃការហូរឈាមក្នុងខួរក្បាលនេះ អាចមានយ៉ាងឆាប់រហ័ស ហើយវិវត្តន៍ទៅជាធ្ងន់ធ្ងរភា្លមៗ។ ដូចគ្នានេះដែរ រោគសញ្ញាទាំងនោះក៏អាចរីកចម្រើន ឬវិវត្តន៍យឺតបន្តិចម្តងៗ ដែលអាចប្រើពេលជាច្រើនម៉ោង ឬថ្ងៃ៕
