ភាសាបេះដូង៖ រឿង ៥ យ៉ាងដែលបេះដូងចង់ប្រាប់អ្នក ដើម្បីរស់នៅបានយូរអង្វែង ។ បេះដូង គឺជាម៉ាស៊ីនដែលមិនដែលសម្រាក វាធ្វើការ២៤ ម៉ោងលើ២៤ ម៉ោង ដើម្បីទ្រទ្រង់ជីវិតរបស់អ្នក ។ ប៉ុន្តែជារឿយៗ យើងតែងតែមើលរំលងសម្លេងខ្សឹបខ្សៀវរបស់វា រហូតទាល់តែមានបញ្ហាកើតឡើង។ នេះ គឺជាសារសំខាន់ៗចំនួន៥ ដែលបេះដូងចង់ប្រាប់អ្នក ដើម្បីឱ្យអ្នកមានសុខភាពល្អ និងរស់នៅបានយូរ ៖
១. សូមផ្តល់អាហារដែលល្អដល់ខ្ញុំ (របបអាហារ)
បេះដូងប្រាប់អ្នកថា វាមិនចូលចិត្តជាតិខ្លាញ់អាក្រក់ ជាតិប្រៃខ្លាំង និងជាតិស្ករច្រើនហួសហេតុនោះទេ ។ បេះដូងចូលចិត្តបន្លែបៃតង ផ្លែឈើ គ្រាប់ធញ្ញជាតិ និងត្រី ។ ការជ្រើសរើសអាហារ ដែលមានសុខភាពល្អ គឺជាការកាត់បន្ថយសម្ពាធលើសរសៃឈាម និងការពារការកកស្ទះ ដែលជួយឱ្យបេះដូងដើរបានស្រួល និងរឹងមាំ ។
២. សូមឱ្យខ្ញុំបានបញ្ចេញកម្លាំងខ្លះ (ការហាត់ប្រាណ)
បេះដូងគឺជាសាច់ដុំ ដូច្នេះវាត្រូវការការហាត់ប្រាណដើម្បីឱ្យរឹងមាំ។ ការដើររហ័ស រត់ត្រឹកៗ ឬហែលទឹក យ៉ាងហោចណាស់៣០នាទីក្នុងមួយថ្ងៃ គឺជាការជួយឱ្យបេះដូងច្របាច់ឈាមបានល្អ និងបង្កើនបរិមាណអុកស៊ីសែនក្នុងរាងកាយ ។ នៅពេលអ្នកធ្វើចលនា បេះដូងរបស់អ្នកនឹងកាន់តែមានថាមពល ។
៣. សូមជួយកាត់បន្ថយសម្ពាធផ្លូវចិត្តឱ្យខ្ញុំផង (ការគ្រប់គ្រងស្រ្តេស)
នៅពេលអ្នកខឹង ព្រួយបារម្ភ ឬស្រ្តេសខ្លាំង បេះដូងរបស់អ្នកត្រូវដើរញាប់ និងរងសម្ពាធខ្ពស់ ។ បេះដូងចង់ប្រាប់អ្នកថា សូមរៀនលែងលះជាមួយភាពតានតឹង តាមរយៈការធ្វើសមាធិ ការសម្រាកឱ្យបានគ្រប់គ្រាន់ និងការគិតវិជ្ជមាន ។ សន្តិភាពផ្លូវចិត្ត គឺជាថ្នាំទិព្វដ៏ល្អបំផុតសម្រាប់សុខភាពបេះដូង ។
៤. សូមមេត្តាឈប់បញ្ជូនផ្សែងពុលមកឱ្យខ្ញុំ (បញ្ឈប់បារី និងគ្រឿងស្រវឹង)
បារី និងជាតិអាកុលហួសកម្រិត គឺជាសត្រូវស៊ីសាច់ហុតឈាមរបស់បេះដូង ។ ជាតិពុលទាំងនេះធ្វើឱ្យសរសៃឈាមរឹង និងរួមតូច ដែលនាំឱ្យបេះដូងត្រូវធ្វើការធ្ងន់លើសកម្លាំង។ ការសម្រេចចិត្តបោះបង់ចោលនូវទម្លាប់អាក្រក់ទាំងនេះ គឺជាកាដូដ៏មានតម្លៃបំផុតដែលអ្នកអាចផ្តល់ឱ្យបេះដូងរបស់អ្នក។
៥. សូមតាមដានសុខភាពខ្ញុំឱ្យបានទៀងទាត់ (ការពិនិត្យសុខភាព)
បេះដូងមិនអាចនិយាយបានទេ ប៉ុន្តែតួលេខនៃសម្ពាធឈាម កម្រិតជាតិស្ករ និងកម្រិតកូឡេស្តេរ៉ុល គឺជាភាសារបស់វា ។ ការពិនិត្យសុខភាពតាមដានជាប្រចាំ ជួយឱ្យអ្នកដឹងពីបញ្ហាដែលកំពុងលាក់មុខ និងអាចការពារគ្រោះថ្នាក់បានទាន់ពេលវេលា មុនពេលអ្វីៗហួសពេល ៕