ជំងឺ Lupus (Systemic Lupus Erythematosus – SLE) គឺជាជំងឺមួយដែលប្រហែលមិនសូវមានមនុស្សច្រើនបានស្គាល់ ឬធ្លាប់ឮនោះទេ ព្រោះជំងឺនេះមិនមានឈ្មោះជាភាសាខ្មែរផ្លូវការ។ ផ្ទុយទៅវិញ ជំងឺនេះត្រូវបានសង្កេតឃើញកើតមានលើប្រជាជនអាស៊ីក្នុងចំនួនខ្ពស់ (Prevalence) ប្រហែល ៣០ ទៅ ៥០ នាក់ ក្នុងចំណោមប្រជាជន ១០០,០០០ នាក់ (ភាគច្រើនកើតឡើងទៅលើ មនុស្សស្រី ច្រើនជាង)។
អ្វីទៅជាជំងឺ Lupus?
Lupus ជាជំងឺមួយដែលបង្កឡើងដោយ ភាពមិនប្រក្រតីនៃប្រព័ន្ធការពារ (Auto Immune Disease)។ ភាពមិនប្រក្រតីនេះធ្វើឱ្យប្រព័ន្ធការពារវាយប្រហារសរីរាង្គខ្លួនឯង។ ជាទូទៅ ជំងឺនេះ ប៉ះពាល់ទៅលើសរីរាង្គច្រើនក្នុងពេលតែមួយ ដែលជាហេតុធ្វើឲ្យមានការ លំបាកក្នុងការធ្វើរោគវិនិច្ឆ័យ។
ក) រោគសញ្ញាដែលយើងអាចឃើញមានដូចជា៖
- អស់កម្លាំង និង គ្រុនក្តៅ រ៉ាំរ៉ៃ
- ជ្រុះសក់ និងមានបញ្ហាលើ ស្បែក ពិសេសលើផ្ទៃមុខ (កន្ទួលរមាស់រាងដូចស្លាបមេអំបៅ)
- ឈឺសន្លាក់
- បាត់បង់គ្រាប់ឈាម (ឈាមក្រហម, ឈាមស ឬផ្លាកែត)
- បញ្ហាតម្រងនោម ដូចជា ទឹកនោមប្រៃ ជាដើម (ការដែលមានការប៉ះពាល់លើតម្រងនោម ជា កត្តាកំណត់នូវភាពធ្ងន់ធ្ងរ របស់ជំងឺ)។
ខ) ការព្យាបាល៖
ការព្យាបាលជំងឺ Lupus ជាទូទៅ ទាមទាររយៈពេលយូរ (លើសពីមួយឆ្នាំ) ហើយពេលខ្លះជំងឺនេះអាច លាប់វិញ បាន។
ដូច្នេះប្រសិនបើបងប្អូនមាន រោគសញ្ញាដូចដែលបានរៀបរាប់ខាងលើ ដែលពុំដឹងមូលហេតុច្បាស់លាស់ សូមអញ្ជើញទៅពិគ្រោះជាមួយគ្រូពេទ្យជំនាញ ដើម្បីកុំឲ្យជំងឺនេះមានការវិវត្តទៅរកសភាពធ្ងន់ធ្ងរ៕
(ប្រភព៖ មន្ទីរពេទ្យកាល់ម៉ែត)