ជំងឺរលាកច្រមុះរ៉ាំរ៉ៃ គឺជាបញ្ហាសុខភាពដែលជួបប្រទះញឹកញាប់ ហើយអាចបង្កផលវិបាកយ៉ាងធ្ងន់ធ្ងរដល់សុខភាពប្រសិនបើមិនព្យាបាលឲ្យបានត្រឹមត្រូវទាន់ពេលវេលា។ នេះបើយោងតាមមន្ទីរពេទ្យកាល់ម៉ែត។
អ្វីទៅជាជំងឺនេះ?
រលាកច្រមុះរ៉ាំរ៉ៃ (Rhinites chroniques) ជាជំងឺដែលបណ្តាលឲ្យភ្នាស់ក្នុងរន្ធច្រមុះមានការហើមប៉ោង បង្កើតរោគសញ្ញាជាច្រើនដូចជា៖
- តឹងច្រមុះ (ម្ខាង សងខាង ឬឆ្លាស់គ្នា)
- ហៀរសំបោរ
- កណ្តាស់ រមាស់ច្រមុះ
- ឈឺក្បាល
- ដកដង្ហើមមិនល្អ
- បាត់ក្លិន បាត់រសជាតិ
- ក្អក ស្ងួតមាត់ គេងស្រមុក
អាការៈមួយចំនួនអាចបន្តទៅដល់បំពង់ក បំពងខ្យល់ ទងសួត ហើយធ្វើឲ្យអ្នកជំងឺមានអាការៈច្របូកច្របល់ជារឿយៗ។
នរណាដែលអាចរងគ្រោះ?
ជំងឺនេះអាចកើតមានលើមនុស្សគ្រប់វ័យ ពិសេសអ្នកមានប្រតិកម្មអាលែហ្ស៊ី អ្នកធ្វើការនៅកន្លែងមានធូលី ផ្កា ឬសារធាតុក្លិនខ្លាំងៗ។ អ្នកប្រើថ្នាំបំបាត់តឹងច្រមុះជាប្រចាំក៏អាចធ្វើឲ្យច្រមុះរលាកបានផងដែរ។
វាធ្វើឱ្យមានបញ្ហារបៀបណា?
ប្រសិនបើមិនព្យាបាលឲ្យបានត្រឹមត្រូវ ជំងឺនេះអាចបណ្តាលឲ្យមានភាពរំខានក្នុងជីវិតប្រចាំថ្ងៃ រួមទាំង៖
- គេងមិនលក់
- គេងស្រមុក
- ខ្សោយកម្លាំង
- មានការរឹតបន្តឹងលើដង្ហើម
- និងអាចនាំឲ្យកើតជំងឺទងសួតក្នុងរយៈពេលវែង
តើវាអាចកើតឡើងពេលណា?
ជំងឺនេះអាចកើតឡើងគ្រប់ពេលវេលា ប៉ុន្តែជាពិសេសក្នុងរដូវផ្ការីក ឬនៅពេលប៉ះពាល់នឹងសារធាតុជះអាលែហ្ស៊ី ឬធូលីអាកាស។ អ្នកជំងឺអាចមានរោគសញ្ញាសកម្មជាទៀងទាត់ ឬជុំជាច្រើនក្នុងឆ្នាំ។
វាឆ្លងឬកើតឡើងដូចម្តេច?
ជំងឺនេះមិនមែនជាជំងឺឆ្លងនោះទេ ប៉ុន្តែបណ្តាលមកពីមូលហេតុជាច្រើន៖
- អាលែហ្ស៊ីទៅនឹងធូលី ផ្កា សត្វចិញ្ចឹម
- ការប្រើថ្នាំសម្រួលច្រមុះពេក
- ការប្រែប្រួលអ័រម៉ូន
- បរិស្ថានគ្មានអនាម័យ
- សភាពមិនធម្មតាផ្នែកក្នុងច្រមុះ
តើព្យាបាលយ៉ាងដូចម្តេច?
ការព្យាបាលអាស្រ័យទៅលើមូលហេតុរបស់ជំងឺ៖
- ប្រើថ្នាំបាញ់ច្រមុះ (corticoïdes locaux) សម្រាប់អាលែហ្ស៊ី
- ថ្នាំបំបាត់រោគសញ្ញា (អង់ទីអាលែហ្ស៊ី)
- ការវះកាត់ (ក្នុងករណីមានរចនាសម្ព័ន្ធមិនប្រក្រតី)
តើអាចបង្ការបានដែរឬទេ?
អាចបង្ការដោយ៖
- លាងដៃជាញឹកញាប់
- សម្អាតផ្ទះ ធ្វើឲ្យមានខ្យល់ចេញចូល
- ពាក់របាំងពេលមានធូលី ឬលំអងផ្កាច្រើន
- ចៀសវាងសត្វចិញ្ចឹម ឬសម្ភារៈបង្កអាលែហ្ស៊ី
- សម្អាតគ្រែ និងសម្លៀកបំពាក់ជាញឹកញាប់
- ធ្វើកាយសម្បទា និងងូតទឹករាល់ថ្ងៃ
ចំណុចសម្គាល់៖
ជំងឺរលាកច្រមុះរ៉ាំរ៉ៃ ជាជំងឺដែលមើលទៅធម្មតា ប៉ុន្តែបើទុកឲ្យវាវិវឌ្ឍន៍វាអាចប៉ះពាល់យ៉ាងធ្ងន់ធ្ងរដល់ការរស់នៅប្រចាំថ្ងៃនិងសុខភាពទូទៅ។ ការពិនិត្យ និងព្យាបាលជាមួយវេជ្ជបណ្ឌិតជំនាញជាប្រចាំគឺជាគន្លឹះសំខាន់ដើម្បីបង្ការ និងបញ្ចប់ជំងឺនេះ៕