បញ្ហាគាំងបេះដូង គឺជាស្ថានភាពសុខភាពដ៏គ្រោះថ្នាក់មួយ ដែលអាចសម្លាប់ជីវិតមនុស្សត្រឹមតែមួយពព្រិចភ្នែក។ ដូច្នេះហើយ ការយល់ដឹងពីសញ្ញាព្រមាននៃបញ្ហាគាំងបេះដូង គឺជារឿងសំខាន់មួយ ដើម្បីឲ្យយើងមានការប្រុងប្រយ័ត្នឲ្យបានខ្ពស់ ក៏ដូចជាអាចជៀសផុតពីគ្រោះថ្នាក់។
យ៉ាងណាមិញ រោគសញ្ញាសំខាន់ៗ ដែលអាចកើតឡើងមួយខែ (ឬលឿនជាងនេះ) មុនមានបញ្ហាគាំងបេះដូងមានដូចជាខាងក្រោម។
១. អស់កម្លាំង
ការអស់កម្លាំងមិនប្រក្រតី គឺជារោគសញ្ញាចម្បងមួយដែលបង្ហាញពីអាការៈគាំងបេះដូងអាចជិតកើតឡើង។ ជាទូទៅ ស្រីៗយើងជួបប្រទះអាការៈនេះច្រើនជាងបុរស។ ការអស់កម្លាំងនេះ មិនមែនកើតឡើងដោយសារតែសកម្មភាពរាងកាយ ឬផ្លូវចិត្តឡើយ វានឹងកើនឡើងនៅពេលយប់។ ដូចនេះ យើងគប្បីសង្កេតឲ្យបានដិតដល់ នៅក្នុងករណីដែលយើងអស់កម្លាំងនៅពេលធ្វើសកម្មភាពងាយៗ ដូចជារៀបចំកន្លែងគេង ឬងូតទឹក។
២. ឈឺពោះ
ជាមួយគ្នានេះដែរ ការឈឺពោះ ចង្អោរ ហើមពោះ ឬឈឺក្រពះ គឺជារោគសញ្ញាទូទៅបំផុត។ ការឈឺពោះមុនពេលគាំងបេះដូង អាចឲ្យយើងដឹងមុនបាន ដោយអាការៈនេះម្ដងជា ម្ដងឈឺនៅក្នុងរយៈពេលខ្លី។ ភាពតានតឹងផ្នែកខាងរាងកាយ អាចធ្វើឲ្យអាការៈឈឺពោះកាន់តែធ្ងន់ធ្ងរលើសដើម។
៣. ជំងឺគេងមិនលក់
ជំងឺគេងមិនលក់ត្រូវបានផ្សារភ្ជាប់នឹងការកើនឡើងហានិភ័យនៃការគាំងបេះដូង ឬជំងឺគ្រោះថ្នាក់សរសៃឈាមខួរក្បាល ដែលជាទូទៅកើតឡើងចំពោះស្ត្រី។ បន្ថែមពីនេះ យើងក៏អាចមានកម្រិតនៃការថប់បារម្ភខ្ពស់ និងភ្លេចភ្លាំងច្រើនផងដែរ។ រោគសញ្ញាទាំងនេះ ក៏រួមបញ្ចូលការពិបាកក្នុងការចាប់ផ្ដើមគេង និងភ្ញាក់តាំងពីព្រលឹម។
៤. ដកដង្ហើមខ្លីៗ
ដកដង្ហើមហត់ ខ្លីៗ តែងតែកើតឡើងទាំងចំពោះបុរស និងស្ត្រីរហូតដល់រយៈពេល៦ខែ មុនពេលមានអាការៈគាំងបេះដូង។ វាជាសញ្ញាព្រមានមួយនៃស្ថានភាពសុខភាព។ ជាធម្មតា យើងនឹងមានអារម្មណ៍មិនអាចទទួលបានអុកស៊ីសែនគ្រប់គ្រាន់ វិលមុខ និងដកដង្ហើមញាប់ៗ។
៥. ជ្រុះសក់
ការជ្រុះសក់ត្រូវបានចាត់ទុកថាជាសញ្ញាចង្អុលបង្ហាញមួយទៀតពីហានិភ័យនៃជំងឺបេះដូង។ ភាគច្រើន វាកើតឡើងចំពោះបុរសដែលមានអាយុលើស៥០ឆ្នាំ ប៉ុន្តែចំពោះស្ត្រីមួយចំនួនក៏អាចស្ថិតក្នុងហានិភ័យនេះដែរ។ ដូចនេះ យើងគប្បីយកចិត្តទុកដាក់ចំពោះបញ្ហាជ្រុះសក់នេះដូចគ្នា។
៦. ចង្វាក់បេះដូងលោតមិនទៀងទាត់
ចង្វាក់បេះដូងលោតមិនទៀងទាត់ អាចកើតឡើងរួមគ្នាជាមួយនឹងអាការៈស្រឺត និងការថប់បារម្ភ ហើយជាពិសេសវាកើតឡើងចំពោះស្ត្រី។ អាការៈនេះកើតឡើងដោយនឹកស្មានមិនដល់ ហើយវាក៏បង្ហាញលក្ខណៈខុសៗគ្នា ដូចជាចង្វាក់បេះដូងលោតមិនទៀងទាត់ ឬចង្វាក់បេះដូងលោតញាប់។ ការធ្វើលំហាត់ប្រាណរាងកាយអាចជំរុញបន្ថែមដល់ការកើនឡើងអត្រាចង្វាក់បេះដូង។ នៅពេលដែលចង្វាក់បេះដូងលោតមិនទៀងទាត់នេះ មិនធូរស្បើយនៅក្នុងរយៈពេល១ទៅ២នាទី ហើយយើងអាចមានអាការៈវិលមុខ និងអស់កម្លាំងខ្លាំងទៀតនោះ ចូរទាក់ទងទៅកាន់គ្រូពេទ្យភ្លាមៗ។
៧. បែកញើសហួសកម្រិត
ការបែកញើសហួសប្រមាណ ឬមិនប្រក្រតីអាចជាសញ្ញាព្រមានដំបូងនៃការគាំងបេះដូង។ វាអាចកើតឡើងនៅពេលណាមួយ ហើយរោគសញ្ញានេះកើតឡើងចំពោះស្ត្រីភាគច្រើន។ នៅពេលដែលយើងមានរោគសញ្ញាស្រដៀងនឹងជំងឺផ្ដាសាយ ឬបែកញើសមិនថាសីតុណ្ហភាពត្រជាក់ ឬឡើងកម្ដៅរាងកាយ យើងគប្បីមានការប្រុងប្រយ័ត្នខ្ពស់។ ម្យ៉ាងវិញទៀត ការបែកញើសច្រើននៅពេលយប់ក៏ជាសញ្ញាព្រមានមួយដែរ។
៨. ឈឺទ្រូង
បុរស និងស្ត្រីជួបប្រទះការឈឺទ្រូងក្នុងលក្ខណៈធ្ងន់ធ្ងរ និង មានទម្រង់ផ្សេងៗគ្នា។ ចំពោះបុរស រោគសញ្ញានេះសំដៅទៅលើរោគសញ្ញាដំបូង និងសំខាន់បំផុតនៃការគាំងបេះដូងដែលជិតចូលមកដល់។ យ៉ាងណាមិញ រោគសញ្ញានេះកើតឡើងចំពោះស្ត្រីត្រឹមតែ៣០% ប៉ុណ្ណោះ។ ការឈឺទ្រូងអាចធ្វើឲ្យមានអារម្មណ៍មិនស្រួលនៅដៃម្ខាង ឬទាំងពីរ ថ្គាមខាងក្រោម ក ស្មា ឬក្រពះ។ វាអាចកើតឡើងលក្ខណៈអចិន្ត្រៃយ៍ ឬបណ្ដោះអាសន្ន ៕