ជីវិតរស់នៅគ្មានស្ត្រេស ជាក្តីស្រមៃមួយរបស់មនុស្សគ្រប់គ្នា ព្រោះស្ត្រេសធ្វើឲ្យយើងស្មុគស្មាញ អារម្មណ៍មិនល្អ ចង់ធ្វើអ្វីក៏មិនកើតដែរ។ ស្ត្រេស ត្រូវបានគេចាត់ទុកជាជំងឺមួយប្រភេទដែលកើតមានឡើងចំពោះអ្នកដែលចូលចិត្តគិតច្រើន ហើយជាញឹកញាប់ជំងឺមួយនេះអាចធ្វើអ្នកងាយនឹងកើតជំងឺបេះដូង សម្ពាធឈាមឡើងខ្ពស់ ដាច់សរសៃឈាមខួរក្បាល ឈឺទ្រូង និងចង្វាក់បេះដូងលោតខុសធម្មតា។
អ្នកជំនាញបានបង្ហាញថា ជំងឺស្ត្រេស អាចធ្វើឲ្យអ្នកមានបញ្ហាភ្លាមៗដូចជា វិលមុខ ឈឺក្បាល មួម៉ៅច្រើន ឬថប់អារម្មណ៍… ជាដើម។ ក្នុងករណីដែលលោកអ្នកកើតមានរោគសញ្ញាទាំងនេះ សូមព្យាយាមគ្រប់គ្រងវាឲ្យបាន ពុំដូច្នោះទេអ្នកអាចប្រឈមនឹងជំងឺដាច់សរសៃឈាមក្នុងខួរក្បាល និងគាំងបេះដូងនៅថ្ងៃណាមួយជាពុំខាន។
ខាងក្រោមនេះ គឺជាគ្រោះថ្នាក់ដែលកើតឡើងដោយសារតែជំងឺស្ត្រេស៖
ស្ទះសរសៃឈាម
ស្របពេលដែលសរសៃឈាមអាក់ទែត្រូវបានរាំងស្ទះ ឈាមមិនអាចផ្គត់ផ្គង់ទៅកាន់តំបន់ផ្សេងៗនៃបេះដូងបានគ្រប់គ្រាន់ឡើយ នេះហើយជាបញ្ហាដែលធ្វើឲ្យអ្នកកើតមានជំងឺគាំងបេះដូង។
ដាច់សរសៃឈាមខួរក្បាល
ក្នុងករណីដែលកម្រិតភាពតានតឹងកើនឡើងកាន់តែខ្លាំង អ្នកច្បាស់ជាប្រឈមនឹងបញ្ហាដាច់សរសៃឈាមខួរក្បាលកាន់តែខ្ពស់ដែរ។ ហេតុនេះ ពេលមានបញ្ហាស្ត្រេសកើតឡើង អ្នកជំនាញបានណែនាំឲ្យគ្រប់គ្នាព្យាយាមគ្រប់គ្រងវាឲ្យបាន។
សម្ពាធឈាមឡើងខ្ពស់
បញ្ហាស្ត្រេសកាន់តែខ្លាំង ធ្វើឲ្យសម្ពាធឈាមក្នុងរាងកាយមានការកើនឡើងខ្ពស់។ នេះហើយមូលហេតុមួយទៀត ដែលបណ្តោលឲ្យមានការខូចខាតដល់សរសៃឈាមក្នុងខួរក្បាល នឹងឈានទៅរកបញ្ហាដាច់សរសៃឈាមខួរក្បាល។
អតុល្យភាពអ័រម៉ូន
នៅពេលដែលអ័រម៉ូនក្នុងរាងកាយអតុល្យភាព កូឡេស្តេរ៉ុលនឹងកើនឡើង កត្តាមួយនេះហើយដែលបណ្តោលឲ្យអ្នកត្រូវប្រឈមហានិភ័យនៃជំងឺបេះដូង ព្រមទាំងជំងឺដាច់សរសៃឈាមក្នុងបេះដូង៕