Join with Health.com.kh on Telegram

រាជធានី​ភ្នំពេញ ៖ សម្តេច​តេ​ជោ ហ៊ុន សែន នាយក​រដ្ឋមន្ត្រី​នៃ​កម្ពុជា​បាន​តេស្ត​ឃើញ​វិជ្ជមាន​កូ​វី​ដ​-១៩ ខណៈ​ដែល​សម្តេច​ត្រៀម​ចូលរួម​កិច្ចប្រជុំ G20 នៅ​កោះ​បាលី ប្រទេស​ឥណ្ឌូ​ណេ​ស៊ី​។

សម្តេច​តេ​ជោ បាន​សរសេរ​លើ​បណ្តាញ​សង្គម​ហ្វេ​ស​ប៊ុ​ក​របស់​ខ្លួន​នា​ព្រឹក​ថ្ងៃ​ទី​១៥ ខែវិច្ឆិកា​នេះ​«​បងប្អូន​ជនរួមជាតិ​ជាទី​គោរព​ស្រឡាញ់​!ពេល​នេះ​ខ្ញុំ​តេស្ត​ឃើញ​វិជ្ជមាន​កូ​វី​ដ​.១៩​។​» សម្តេច​បន្ថែម​ទៀត​ថា​« មុន​ចេញពី​កម្ពុជា​ខ្ញុំ​ធ្វើតេស្ត​រាល់ថ្ងៃ​ពិសេស​មុន​ពេល​ចេញដំណើរ​មក​ខ្ញុំ​ធ្វើតេស្ត​រហ័ស​មុន​ឡើង​យន្តហោះ​តែ​ពុំ​មាន​ឃើញ​អ្វី​នោះ​ឡើយ​។​ខ្ញុំ​មិន​ច្បាស់​ថា មេរោគ​នេះ​មក​នៅ​ជាមួយ​ខ្លួន​ខ្ញុំ​ចាប់ពី​ពេល​ណា​មកនោះ​ឡើយ តែ​អ្វី​ដែល​ច្បាស់​ពេល​មក​ដល់​ពេទ្យ​ឥណ្ឌូ​នេ​ស៊ី​យក​សំណាក​ពេល​ល្ងាច​លុះ​ព្រឹក​ឡើង​បញ្ជាក់​ថា វិជ្ជមាន​កូ​វី​ដ​.១៩ដែល​យើង​ត្រូវ​តែ​ទទួលស្គាល់​បើ​ទោះជា​ក្នុង​ខ្លួន​យើង មិន​មាន​អាកា​រៈ​ចម្លែក​ក៏​ដោយ​។​»

សម្តេច​តេ​ជោ​បាន​បញ្ជាក់​ថា ជា​សំណាង​មួយ​ដែល​យប់មិញ​ដោយសារមក​ដល់​យឺត​ខ្ញុំ​មិន​បាន​ទៅ​ចូលរួម​បាយ​ល្ងាច​ជាមួយ​ប្រមុខរដ្ឋ ប្រមុខ​រដ្ឋាភិបាល​មួយ​ចំនួន​ដែល​រៀបចំ​ដោយ​ប្រធានាធិបតី​បារាំង​។​ដើម្បី​សុវត្ថិភាព​សម្រាប់​ប្រតិភូ​ដែល​ចូលរួម​ប្រជុំ​ខ្ញុំ​សម្រេច​ឲ្យ​ប្រតិភូ​កម្ពុជា​វិល​ត្រឡប់​ទៅ​កម្ពុជា​វិញ​ទាំងអស់​។​ឯ​តំណាង​ប្រទេស​អាស៊ាន​យើង​កំពុង​ចរចា​ប្រគល់​ជូន​ឥណ្ឌូ​នេ​ស៊ី​ជា​តំណាង​តែ​ម្តង​។

ប្រមុខ​រដ្ឋាភិបាល​កម្ពុជា អ្វី​ដែល​អាក់ខាន គឺ​ជំនួប​បាន​គ្រោងទុក​ជាមួយ​ប្រធានាធិបតី​ចិន​និង​ប្រធានាធិបតី​បារាំង​ដែល​គ្រោង​ជួប​គ្នា​នៅ​បាងកក​ប្រទេស​ថៃ​នា​ពេល​ប្រជុំ​APEC​។​ខ្ញុំ​គ្រោង​ត្រឡប់​ទៅ​ដល់​កម្ពុជា​វិញ​នៅ​ល្ងាច​ថ្ងៃនេះ​ជាមួយ​អាកា​រៈ​ធម្មតា​ដែល​ខ្ញុំ​នឹង​បន្ត​ធ្វើការ​ធម្មតា​លើកលែងតែ​ការ​ទទួលភ្ញៀវ​៕

ទំនាក់ទំនងផ្សាយពាណិជ្ជកម្មសូមទូរស័ព្ទមកលេខ 011688855
អត្ថបទទាក់ទង