ហានិភ័យគួរឲ្យខ្លាចរបស់ជំងឺលើសឈាម គឺកូឡេស្តេរ៉ូលខ្ពស់ និងឆាប់ស្លាប់ ។
ការស្រាវជ្រាវមួយដែលត្រូវបានប្រកាសដោយសាស្ត្រាចារ្យ នៅសកលវិទ្យាល័យ London និងសកលវិទ្យាល័យ Glasgow កាលពីពេលកន្លងទៅ បានព្រមាននូវហានិភ័យគួរឲ្យខ្លាចដែលអ្នកអាចស្វ័យគណនាចេញពីសន្ទស្សន៍ BMI របស់ខ្លួន ។
ការស្រាវជ្រាវលើសំណុំឯកសារសុខភាពរបស់ជនជាតិអង់គ្លេស ២,៨ លាននាក់ បានឲ្យឃើញថា ដោយគ្រាន់តែសរីរាង្គអ្នកមានសញ្ញា «ធាត់បន្តិច» ជាមួយនឹងសន្ទស្សន៍ BMI ពី ២៥ ទៅ ៣០ នោះ ហានិភ័យលើសឈាម កូឡេស្តេរ៉ូលខ្ពស់ បានកើនថែមដល់ ៥០% ប្រៀបនឹងអ្នកមានទម្ងន់ធម្មតា ។ ចំពោះទម្ងន់នេះ អ្នកក៏ធ្វើឲ្យហានិភ័យជំងឺទឹកនោមផ្អែមប្រភេទ២ និងជំងឺបាត់ដង្ហើមពេលគេង ជំងឺរលាកឆ្អឹងសន្លាក់ កើនផងដែរ។
ចំពោះមនុស្សធាត់ BMI ពី ៣០ ទៅ ៣៥ ហានិភ័យទឹកនោមផ្អែម កើនឡើង ៥ ដង ហានិភ័យលើសឈាម និងកូឡេស្តេរ៉ូលខ្ពស់កើនទ្វេដង ។
ចំពោះអ្នកធាត់ធ្ងន់ធ្ងរ ពោលគឺ BMI លើស ៤០ ហានិភ័យឆាប់ស្លាប់ដោយគ្រប់មូលហេតុកើនឡើងដល់ ៥០% ក្នុងនោះ ហានិភ័យកើតជំងឺបាត់ដង្ហើមពេលគេង ដែលអាចឱ្យអ្នកស្លាប់បាន កើនដល់ ២២ ដង ។ ហានិភ័យទឹកនោមផ្អែមប្រភេទ២ ក៏កើនឡើង ១២ ដង៕
