Join with Health.com.kh on Telegram

រាជធានី​ភ្នំពេញ ៖ សម្តេច​តេ​ជោ ហ៊ុន សែន នាយក​រដ្ឋមន្ត្រី​នៃ​កម្ពុជា នៅ​ព្រឹក​ថ្ងៃ​ទី​២២ ខែកុម្ភៈ​នេះ បាន​អំពាវនាវ​ដល់​ឱសថស្ថាន កន្លែង​លក់​ថ្នាំ​ទាំងអស់ សូមកុំ​ដំឡើង​ថ្លៃ​ថ្នាំ​ព្យាបាល​ជំងឺ​កូ​វី​ដ​១៩ តាម​ចិត្ត ដើម្បី​ជួយ​ឲ្យ​បងប្អូន​ប្រជាពលរដ្ឋ​ដែល​ឆ្លង​ជំងឺ​កូ​វី​ដ​១៩ ងាយ​ទិញ​សម្រាប់​ព្យាបាល ។

ថ្លែង​ក្នុង​បើក​ការដ្ឋាន​សាងសង់​ស្ថានីយ​ប្រព្រឹត្ត​កម្ម​ទឹក​កខ្វក់​បឹង​ជើងឯក លើ​ផ្ទៃដី​ទំហំ​៣​ហិ​កតា ស្ថិត​នៅ​ភូមិ​ព្រែក​តា​គង់​១ សង្កាត់​ចាក់​អង្រែ​លើ ខណ្ឌមានជ័យ រាជធានី​ភ្នំពេញ នា​ព្រឹក​ថ្ងៃ​ទី​២២ ខែកុម្ភៈ នេះ ។

នៅ​ក្នុង​ឱកាស​នោះ​ផង​ដែរ សម្តេច​តេ​ជោ នាយក​រដ្ឋមន្ត្រី​ក៏​បាន​អំពាវនាវ​ដល់​ឱសថស្ថាន​ទាំងអស់ កុំ​ដំឡើង​ថ្លៃ​ថ្នាំ​ព្យាបាល​ជំងឺ​កូ​វី​ដ​-១៩ នៅ​ពេល​ដែល​ប្រជាពលរដ្ឋ​កំពុង​មាន​តម្រូវការ​នោះ ។

ជាមួយ​គ្នា​នេះ សម្តេច​តេ​ជោ​ប្រមុខ​រាជរដ្ឋាភិបាល បាន​ណែនាំ​ដល់​ក្រសួងសុខាភិបាល ដែល​មាន​កាតព្វកិច្ច​ក្នុង​ការ​ត្រួតពិនិត្យ​ថ្នាំ​ព្យាបាល​កូ​វី​ដ​១៩ ត្រូវ​ពង្រឹង​ការ​ត្រួតពិនិត្យ​ជៀសវាង​ប្រជាពលរដ្ឋ​ទិញ​ប៉ះ​ថ្នាំ​ក្លែងក្លាយ ដែល​ប៉ះពាល់​ដល់​សុខភាព និង​ខាតបង់​ថវិកា ។

សូម​បញ្ជាក់​ថា រយៈពេល​ចុង​ក្រោយ​នេះ ការ​ឆ្លង​រាលដាល​ជំងឺ​កូ​វី​ដ​១៩ បំប្លែង​ថ្មី អូ​មី​ក្រុង បាន​កើនឡើង​ច្រើន នាំ​ឲ្យ​ប្រជាពលរដ្ឋ​សម្រុក​នាំ​គ្នា​ទៅ​ទិញ​ថ្នាំ Molnupiravir សម្រាប់​ព្យាបាល​ខ្លួនឯង​នៅ​តាម​ផ្ទះ ៕