មានរឿងច្រើនណាស់ ដែលក្លាយជាចម្ងល់នានា ទាក់ទងទៅនឹងបញ្ហាផ្លូវភេទ ពេលខ្លះ វាពិបាកនឹងជឿទៀតផង តែវាគឺជាការពិត។ ការស្វែងយល់អំពី បញ្ហាទាំងនេះបានច្បាស់លាស់ អាចជួយឲ្យអ្នកមានសុខភាពល្អ និងមានសុវត្ថិភាព ក្នុងពេលរួមភេទ ជាមួយនឹងដៃគូរបស់អ្នក។
មនុស្សភាគច្រើនតែងយល់ច្រឡំថា ការបញ្ចេញទឹកកាមនៅខាងក្រៅប្រដាប់ភេទនារី (ចាក់ទឹកក្រៅពាង) អាចការពារការមានផ្ទៃពោះបាន ប៉ុន្តែ វាមិនមែនជាការពិតនោះទេ ស្ត្រីនៅតែអាចមានផ្ទៃពោះ ទោះបីជាបុរសដកលិង្គ មកបញ្ចេញទឹកកាមនៅខាងក្រៅក៏ដោយ។
មុនពេលមនុស្សប្រុសឈានដល់ចំណុចកំពូល និងបញ្ចេញទឹកកាម មានមេជីវិតឈ្មោលជាច្រើនបានលេចចេញ ក្នុងពេលអ្នកកំពុងរួមភេទរួចទៅហើយ ពិសេស ពេលបុរសមានសម្រើបខ្លាំង។ ដូចអ្នកបានដឹងហើយថា ត្រឹមតែមេជីវិតឈ្មោលមួយក្បាល គឺអាចធ្វើឲ្យស្ត្រី មានផ្ទៃពោះបានហើយ។ ម្យ៉ាងវិញទៀត ការចាក់ទឹកក្រៅពាង ក៏នៅតែអាចបង្កការឆ្លងជំងឺកាមរោគបានផងដែរ ប្រសិនបើអ្នក ឬដៃគូអ្នកមានផ្ទុកជំងឺនោះ។
ប្រសិនបើមនុស្សប្រុសនិយាយថា “កុំភ័យអី ! បងអាចដកវាចេញទាន់ មុនពេលបងឈានដល់ចំណុចកំពូល” … កុំជឿឲ្យសោះ គ្មាននរណាអាចទប់ស្កាត់មេជីវិតឈ្មោល មិនឲ្យលេចចេញ ក្នុងពេលរួមភេទបាននោះទេ។ ដូច្នេះ អ្នកត្រូវចេះការពារ និងប្រើប្រាស់ស្រោមអនាម័យ ប្រសិនបើអ្នកមិនទាន់ចង់បានកូន និងមិនចង់ឆ្លងជំងឺកាមរោគនោះ។