Join with Health.com.kh on Telegram

មនុស្ស​ដែល​មាន​សម្ពាធ​ឈាម​ឡើង​ខ្ពស់​ មាន​អត្រា​ជំងឺ​បញ្ហា​គាំងបេះដូង​ខ្ពស់​ជាង​អ្នក​ដែល​មិន​មាន​សម្ពាធ​ឈាម​ឡើង​ខ្ពស់ ។ ​អ្នក​ដែល​មាន​សម្ពាធ​ឈាម​ធម្មតា​ក៏​ដោយ ក៏​ពួក​គេ​អាច​កើត​មាន​ជំងឺ​គាំងបេះដូង​ដែរ​។ ការ​ឡើង​សម្ពាធ​ឈាម​ខ្ពស់​អាច​បណ្តាល​អោយ​ខូចខាត​ដល់​បេះដូង​តាម​ពីរ​របៀប​៖

គាំងបេះដូង
ការ​ឡើង​សម្ពាធ​ឈាម​ខ្ពស់​ជួយ​តម្លើង​ល្បឿន​ដល់​ការ​ឡើង​ក្រាស់ និង​រឹង​របស់​សរសៃឈាម​បេះដូង​កូ​រូ​ណា​រី (Coronary) ដែល​មាន​នាទី​ផ្គត់ផ្គង់​ឈាម​ដល់​សាច់ដុំ​បេះដូង ហើយ​ដំណើរការ​នៃ​ជំងឺ​នេះ​មានឈ្មោះ​ថា​ការ​ក្រិន​សរសៃ​ឈាន Atherosclerosis​។ គ្រោះថ្នាក់​ដ៏​ធំ​បំផុត​នៃ​ជំងឺ Atherosclerosis គឺ​កំនក​ឈាម​ប្រហែលជា​កើត​មាន និង​ធ្វើ​អោយ​ស្ទះ​ជិត​សរសៃឈាម​អាក់ទែ​នេះ​តែ​ម្តង​។

នៅ​ពេល​ដែល​ហេតុការណ៍​នេះ​កើត​មាន​មែន លំហូរ​ឈាម​សម្រាប់​ចូល​ទៅ​ក្នុង​សរសៃឈាម​នេះ​ត្រូវ​បាន​កាត់​ផ្តាច់​។ នៅ​ពេល​ដែល​កំនក​ឈាម​នៅ​ក្នុង​សរសៃឈាម​បេះដូង​បែប​នេះ អ្នក​នឹង​មាន​បញ្ហា​គាំងបេះដូង​។

មាន​ប្រជាជន​ប្រហែល​ពាក់កណ្តាល​ទទួល​រង​ការ​ឈឺចាប់​ដោយសារ​ការ​គាំងបេះដូង ​ជា​លើក​ដំបូង​របស់​ពួក​គេ​នៅ​ពេល​មាន​ជំងឺ​លើស​សម្ពាធ​ឈាម​ជា​មធ្យម ១៦០/៩៥ ឬ​ខ្ពស់​ជាង​នេះ​។ ការ​ឡើង​សម្ពាធ​ឈាម​ខ្ពស់​ធ្វើ​អោយ​ប្រឈម​កាន់តែ​ខ្លាំង​ទៅ​នឹង​ការ​គាំងបេះដូង​រហូត​ដល់ ៥​ដង នេះ​បើ​យោង​ទៅ​តាម​ភាព​ធ្ងន់ធ្ងរ​របស់​ជំងឺ​លើស​សម្ពាធ​ឈាម​។

ខ្សោយបេះដូង
ការ​ឡើង​សម្ពាធ​ឈាម​ខ្ពស់​រ៉ាំរ៉ៃ​អាច​វិវត្តន៍​ទៅ​ជា​បេះដូង​រីក​ធំ​។
នៅ​ពេល​ដែល​បេះដូង​ខំ​ច្របាច់​កាន់តែ​ខ្លាំង​ដើម្បី​បាញ់​ឈាម​ចូល​ទៅ​ក្នុង​សរសៃឈាម​អាក់ទែរ ស្ត្រេ​ស​ដ៏​ខ្លាំង​គឺ​ធ្លាក់​មក​លើ​បេះដូង​។ នៅ​ពេល​បេះដូង​ត្រូវ​បង្ខំចិត្ត​ធ្វើការ​ទាំង​ស្ត្រេ​ស​រយៈពេល​យូរ សាច់ដុំ​បេះដូង​នឹង​រីក​ធំ​ឡើង​ដើម្បី​ឆ្លើយ​តប​ទៅ​នឹង​សម្ពាធ​ដែល​កាន់តែ​ខ្ពស់​ជាង​មុន​។

ការ​ធ្វើការ​បន្ថែម​ក្នុង​ការ​ច្របាច់​ឈាម​ប្រឆាំង​ទៅ​នឹង​ការ​កើនឡើង​សម្ពាធ​ធ្វើ​អោយ​បេះដូង​ថត​ខាងក្រោម ផ្នែក​ខាងឆ្វេង (Left Ventricle) ដែល​មាន​តួនាទី​ច្របាច់​ឈាម​ចេញ​នោះ​ទៅ​ជា​រីក​ធំ ហើយ​វា​ក៏​ដូច​គ្នា​ទៅ​នឹង​សាច់ដុំ​ដើមដៃ (Bicep) ដែរ ដែល​វា​នឹង​រីក​ធំ​នៅ​ពេល​លើក​របស់​អ្វីមួយ​ធ្ងន់​។

ប្រសិនបើ Left Ventricle ទៅ​ជា​ឡើង​រីក​ធំ​ហើយ វា​ប្រហែលជា​មិន​អាច​មាន​លទ្ធភាព​ច្របាច់​ឈាម​ចេញ​បាន​គ្រប់គ្រាន់​ទៀត​ទេ ហើយ​ឈាម​ជា​ច្រើន​ប្រហែលជា​អាច​ហូរ​ចាល់​ទៅ​ក្នុង​សួត​វិញ និង​ធ្វើ​អោយ​អ្នកជំងឺ​ពិបាក​ដកដង្ហើម និង​ក្អក​រ៉ាំរ៉ៃ​។ បញ្ហា​នេះ​ត្រូវ​បាន​គេ​អោយឈ្មោះ​ថា ឈាម​ច្រាស់​មក​សួត​វិញ​ដោយសារ​ខ្សោយបេះដូង (Congestive Heart Failure)​៕