ខេត្តរតនគិរី ៖ មន្ទីរព័ត៌មានខេត្តរតនគិរី បានប្រកាសនៅថ្ងៃទី០២ ខែកញ្ញានេះថា ក្រុមការងារឆ្លើយតបបន្ទាន់មន្ទីរសុខាភិបាលនៃរដ្ឋបាលខេត្តរតនគិរី ចុះយកសំណាកធ្វើតេស្ដរហ័សលើអាជីវករ ក្នុងផ្សារបានលុង ក្រោយរកឃើញវិជ្ជមានជំងឺកូវីដ-១៩ លើអាជីវករជាច្រើននាក់ ។
ក្រោយពីមានការរកឃើញករណីវិជ្ជមានកូវីដ-១៩ លើអាជីវករជាច្រើននាក់ ដែលលក់ដូរនៅក្នុងផ្សារបានលុង កាលពីថ្ងៃទី០១ ខែកញ្ញា ឆ្នាំ២០២១ រដ្ឋបាលខេត្តរតនគិរីបានចេញសេចក្ដីសម្រេចលេខ ០៨២/២១ ស.ស.រ ចុះថ្ងៃទី០១ ខែកញ្ញា ឆ្នាំ២០២១ ស្ដីពីការបិទខ្ទប់ជាបណ្ដោះអាសន្ន ផ្សារបានលុង ស្ថិតក្នុងក្រុងបានលុង ខេត្តរតនគិរី ក្នុងគោលបំណងដើម្បីទប់ស្កាត់ការរាលដាលនៃជំងឺកូវីដ-១៩ ចាប់ពីថ្ងៃទី០២ ខែកញ្ញា ឆ្នាំ២០២១ រហូតដល់មានការសម្រេចជាថ្មី ។
ជាក់ស្ដែង នៅព្រឹកថ្ងៃទី០២ ខែកញ្ញា ឆ្នាំ២០២១នេះ គណៈបញ្ជាការឯកភាពក្រុងបានលុងបានសហការជាមួយក្រុមការងារឆ្លើយតបបន្ទាន់មន្ទីរសុខាភិបាល នៃរដ្ឋបាលខេត្តរតនគិរី ចុះយកសំណាកធ្វើតេស្ដរហ័សលើអាជីវករដែលពាក់ព័ន្ធផ្ទាល់ និងប្រយោលទាំងអស់ នៅបរិវេណផ្សារបានលុង ស្ថិតក្នុងសង្កាត់ឡាបានសៀក ក្រុងបានលុង ខេត្តរតនគិរី។
លោក ងិន ណែល អភិបាលក្រុងបានលុងបានលើកឡើងថា ការធ្វើតេស្ដសំណាកលើអាជីវករនៅព្រឹកនេះ គឺដើម្បីស្វែងរកអ្នកពាក់ព័ន្ធ និងអ្នកដែលសង្ស័យមានឆ្លងបន្ដពីអ្នកដែលវិជ្ជមានកាលពីថ្ងៃទី០១ ខែកញ្ញា ដែលជាអាជីវករលក់ដូរក្នុងផ្សារបានលុង ដើម្បីកាត់ផ្ដាច់ការចម្លងទាន់ពេលវេលា មិនអោយមានករណីមានការឆ្លងច្រើនបន្ដទៀត។
លោកអភិបាលក្រុងក៏បានសំណូមពរអោយបងប្អូនប្រជាពលរដ្ឋទាំងអស់ ដែលបានប៉ះពាល់ផ្ទាល់ ឬប្រយោល សូមរួសរាន់មកធ្វើតេស្ដសំណាកអោយបានទាន់ពេលវេលា ជៀសវាងការចម្លងទៅក្រុមគ្រួសារដោយមិនដឹងខ្លួន និងត្រូវបន្ដអនុវត្តតាមវិធានការសុខាភិបាល ៣ការពារ ៣កុំ អោយបានខ្ជាប់ខ្ជួន រួមមានពាក់ម៉ាស់ លាងដៃអោយបានញឹកញាប់ រក្សាគម្លាត និងត្រូវចូលរួមសហការទាំងអស់គ្នា ដើម្បីយើងអាចកាត់ផ្ដាច់ការចម្លងជំងឺនេះទាំងស្រុងបាន។
តាមរបាយការណ៍បឋមរបស់មន្ទីរសុខាភិបាលខេត្តបានអោយដឹងថា ជាលទ្ធផលនៃការយកសំណាក គិតចាប់ពីម៉ោង ៨:៣០នាទីព្រឹក ដល់ម៉ោង១២:៣០នាទីថ្ងៃត្រង់ ថ្ងៃទី០២ ខែកញ្ញា ឆ្នាំ២០២១នេះ ក្រុមការងារឆ្លើយតបបន្ទាន់មន្ទីរសុខាភិបាល នៃរដ្ឋបាលខេត្តរតនគិរី បានធ្វើតេស្ដសំណាកមនុស្សចំនួន២៤១នាក់ ក្នុងនោះស្រី១៧៧នាក់ ហើយបានរកឃើញករណីវិជ្ជមានចំនួន ១៥នាក់ ក្នុងនោះស្រី១៣នាក់ និងប្រុស០២នាក់ ៕