Join with Health.com.kh on Telegram

ខេត្តរតនគិរី ៖ មន្ត្រី​ជំនាញ និង​អ្នក​ពាក់ព័ន្ធ​ចុះ​ពិនិត្យ និង​សិក្សា​នៅ​ផ្សារ​បាន​លុង ក្នុង​ក្រុង​បាន​លុង កាលពី​ថ្ងៃ​ទី​១៦ ខែសីហា ឆ្នាំ​២០២១​ថ្មី​ៗ​នេះ អាជ្ញាធរ​ខេត្ត​នឹង​ធ្វើការ​ផាកពិន័យ​ធ្ងន់ធ្ងរ​ជាង​មុន​ទៅ​លើ​អាជីវករ​ណា​ដែល​មិន​ពាក់​ម៉ាស់ និង​ពាក់​ម៉ាស់​មិន​ត្រឹមត្រូវ ព្រមទាំង​ប្រជាពលរដ្ឋ​ណា​ដែល​ធ្វើការ​ជួបជុំ​គ្នា​ច្រើន​ខុស​ពី​ការ​ណែនាំ​របស់​រាជរដ្ឋាភិបាល​ក៏​ដូច​ជា​ក្រសួងសុខាភិបាល ក្នុង​ការ​ចូលរួម​ទប់ស្កាត់​ការ​រីក​រាលដាល​ជំងឺ​កូ​វី​ដ​-១៩ ។ នេះបើយោងតាមមន្ទីរព័ត៌មានខេត្តរតនគិរី ។

ការ​ផាកពិន័យ​នេះ គឺ​ធ្ងន់ធ្ងរ​ជាង​លើក​មុន ព្រោះ​ក្នុង​គោលបំណង​មិន​ឲ្យ​មេរោគ​កូ​វី​ដ​-១៩ ឆ្លង​រាលដាល​ទាំង​អ្នកលក់ ទាំង​អ្នកទិញ និង​បងប្អូន​ប្រជាពលរដ្ឋ​ទូ​ទាំង​ខេត្តរតនគិរី ។

ការ​ចុះ​ណែនាំ​ក៏​ដូច​ជា ផាកពិន័យ​លើ​អាជីវករ​ផ្សារ​បាន​លុង និង​ប្រជាពលរដ្ឋ​ក្នុង​ក្រុង​បាន​លុង​នៅ​ពេល​នេះ នៅ​មិន​ទាន់​ពិន័យ​ជា​ប្រាក់​នៅឡើយ​ទេ ដោយសារ​យើង​មានការ​យោគយល់​ដល់​ប្រជាពលរដ្ឋ តែ​ឥឡូវនេះ​ជំងឺ​កូ​វី​ដ​-១៩ បំប្លែង​ថ្មី ជា​ប្រភេទ​ដែល​តា​(Delta) បាន​កំពុង​រាលដាល​ខ្លាំង​ក្នុង​សហគមន៍ ដូច្នេះ​អាជ្ញាធរ​ខេត្ត នឹង​អនុវត្ត​ច្បាប់​ផាកពិន័យ​ក្នុង​ពេល​ឆាប់​ៗ​នេះ ទៅ​លើ​អ្នក​ដែល​មិន​ពាក់​ម៉ាស និង​ការ​ប្រមូលផ្ដុំ ឫ​ផឹកស៊ី​តាម​ទី​សាធារណៈ ពិសេស​ក្នុង​ពេល​ដែល​អាជីវក​របើក​លក់ដូរ​នៅ​ផ្សារ​បាន​លុង អាជីវករ​ត្រូវ​អនុវត្ដ​កាតព្វកិច្ច​ពាក់​ម៉ាស និង​ត្រូវ​អនុវត្ដ​វិធានការ​របស់​រាជរដ្ឋាភិបាល​ឲ្យ​បាន​ត្រឹមត្រូវ គឺ​៣​កុំ និង​៣​ការពារ ។

ជាមួយ​គ្នា​នោះ​ដែរ មុន​នឹង​ចុះ​ធ្វើការ​ផាកពិន័យ​នេះ អាជ្ញាធរ​បាន​ចុះ​ណែនាំ​ជា​ច្រើន​ដង​មក​ហើយ ប៉ុន្ដែ​អាជីវករ​មួយ​ចំនួន​តូច​មិន​អនុវត្ដ​តាម​ទើប​អាជ្ញាធរ អនុវត្ដ​ទៅ​តាម​ផ្លូវច្បាប់ ខណៈ​ដែល​ការ​មិន​ពាក់​ម៉ាស់​នេះ សង្កេត​ឃើញ​ថា មាន​អាជីវករ​ប្រមាណ​៥​ភាគរយ​ប៉ុណ្ណោះ​ដែល​ពួក​គាត់​មិន​អនុវត្ត​តាម​ច្បាប់​៕