រាជធានីភ្នំពេញ ៖ ក្រសួងសុខាភិបាលចេញសេចក្តីជូនដំណឹងស្តីពីភូមិសាស្ត្រដែលត្រូវអនុវត្តពាក់ម៉ាសក្នុងនោះមាន ខេត្តចំនួន១៥ ទៀតត្រូវបានកំណត់ ជាភូមិសាស្ត្រដាក់ឲ្យអនុវត្តកាតព្វកិច្ចពាក់ម៉ាស់ និងកាតព្វកិច្ចរក្សាគម្លាតសុវត្ថិភាព ។
នៅក្នុងខេត្តចំនួន១៥ នោះមាន ៖ ភូមិសាស្ត្រខេត្តពោធិ៍សាត់ បាត់ដំបង មណ្ឌលគិរី រតនគិរី ក្រចេះ ស្ទឹងត្រែង កំពត កែប កំពង់ធំ ព្រះវិហារ ប៉ៃលិន កោះកុង កំពង់ឆ្នាំង ត្បូងឃ្មុំ និងខេត្តឧត្ដរមានជ័យ ត្រូវបានកំណត់យកជាភូមិសាស្ត្រតម្រូវឱ្យមានការអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ។
សូមបញ្ជាក់ ៖ លោកជំទាវ ឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងសុខាភិបាល បានបញ្ជាក់ថា បុគ្គលមួយចំនួននៅតែមានការយល់ច្រឡំចំពោះការចាក់វ៉ាក់សាំងកូវីដ-១៩ រួចហើយលែងឆ្លងកូវីដ-១៩ លោកជំទាវ បានបញ្ជាក់ថា សូមកុំមានការយល់ច្រឡំទៀត ការចម្លងវីរុសកូវីដ-១៩ នៅកម្ពុជានៅតែមានបើទោះបីបុគ្គលម្នាក់ៗបានទទួលវ៉ាក់សាំងការពារកូវីដ-១៩រួច ហើយក្តី ។
ថ្លែងក្នុងសន្និសីទសារព័ត៌មាន យុទ្ធនាការ រួមគ្នាទទួលខុសត្រូវទប់ស្កាត់ការចម្លងវីរុសកូវីដ-១៩ ថ្ងៃទី១៦ ខែសីហា ឆ្នាំ២០២១ លោកជំទាវ បានលើឡើងថា បើសិនបុគ្គលម្នាក់ៗ នៅតែមានការជួបជុំគ្នា បរិភោគអាហាររួមគ្នា នៅកន្លែងបិទជិត និងចង់ធ្វើដំណើរទៅធ្វើការងារផ្សេងៗ ដោយមិនអនុវត្តវិធានការសុខាភិបាល កត្តាទាំងនេះវានឹងបង្កឲ្យផ្ទុះឡើងការចម្លងវីរុសកូវីដ-១៩ ពីមនុស្សម្នាក់ទៅកាន់មនុស្សម្នាក់ទៀតជាក់ជាមិនខាន ៕