Join with Health.com.kh on Telegram

ខេត្តបាត់ដំបង ៖ សម្ដេច​ក្រឡាហោម ស ខេ​ង ឧបនាយករដ្ឋមន្ត្រី រដ្ឋមន្ត្រី​ក្រសួងមហាផ្ទៃ បាន​បញ្ជាក់​ថា ខេត្តបាត់ដំបង ជា​ខេត្ត​ជាប់​ព្រំដែន​ជាមួយ​ថៃ ហើយ​ថៃ​កំពុង​ស្ថិត​ក្នុង​អត្រា​ឆ្លង​ខ្ពស់​នៃ​មេរោគ​កូ​វី​ដ​-១៩ បំប្លែង​ថ្មី Delta ធ្វើ​ឲ្យ​ពលករ​ខ្មែរ​ត្រឡប់​មក​កម្ពុជា​វិញ​ជា​បន្តបន្ទាប់​បាន​ក្លាយជា​បញ្ហា​ប្រឈម​ថ្មី​មួយ ទាមទារ​ឲ្យ​មានការ​ខិតខំ​ដោះស្រាយ ។

សម្តេច ស ខេ​ង បាន​ថ្លែង​ក្នុង​កិច្ចប្រជុំ​ស្ដី​ពី​ការងារ​ប្រយុទ្ធ​ប្រឆាំង​នឹង​ជំងឺ​កូ​វី​ដ​-១៩ នៅ​ក្នុង​ខេត្តបាត់ដំបង និង​បញ្ហា​ប្រឈម​កាលពី​ថ្ងៃ​ទី​៩ ខែសីហា ឆ្នាំ​២០២១ តាម​ប្រព័ន្ធ​វី​ដេ​អូ សម្ដេច ស ខេ​ង បាន​ថ្លែង​ថា ការ​ដោះស្រាយ​បញ្ហា​ប្រឈម​នានា​បង្ក​ឡើង​ដោយ​ការ​រីក​រាលដាល​មេរោគ​បំប្លែង​ថ្មី ដែល​ខេត្តបាត់ដំបង ក៏​ស្ថិត​ក្នុង​តំបន់​ងាយ​ឆ្លង​ជំងឺ​នេះ​ដែរ ។

សម្ដេច ស ខេ​ង ៖«​ខេត្តបាត់ដំបង គឺជា​ខេត្ត​មួយ​ជាប់​ព្រំដែន​ជាមួយ​ប្រទេស​ថៃ ហើយ​ប្រទេស​ថៃ​កំពុង​ស្ថិត​ក្នុង​អត្រា​ឆ្លង​ខ្ពស់​នៃ​មេរោគ​កូ​វី​ដ​-១៩ ពិសេស​មេរោគ​បំប្លែង​ថ្មី ដែល​ធ្វើ​ឱ្យ​ប្រជាពលរដ្ឋ​ខ្មែរ ពិសេស​ក្រុម​ប្រជាពលរដ្ឋ​ជា​ក្រុម​ពលករ​នាំ​គ្នា​ធ្វើ​ដំណើរ​ត្រឡប់​មក​វិញ​ជា​បន្តបន្ទាប់ និង​បាន​ក្លាយជា​បញ្ហា​ប្រឈម​ថ្មី​មួយ​ដែល​ទាមទារ​ឱ្យ​មានការ​ខិតខំ​ដោះស្រាយ​» ។

សូម​បញ្ជាក់​ថា ដោយសារ​តែ​តំបន់​ព្រំដែន កម្ពុជា ថៃ មានការ​ឆ្លង​ច្រើន​នៃ​ជំងឺ​កូ​វី​ដ​១៩ បំប្លែង​ថ្មី​Delta ប្រមុខ​រាជរដ្ឋាភិបាល​បាន​ដាក់​យុទ្ធសាស្ត្រ​ចាក់​វ៉ាក់សាំង​ប្រឆាំង​ជំងឺ​កូ​វី​ដ​១៩ ដូ​ស​ទី​៣ ដល់​មន្ត្រី​ជួរ​មុខ​នៅ​តំបន់​ព្រំដែន​ចំនួន​៧​ខេត្ត​ផង​ដែរ ៕