រាជធានីភ្នំពេញ ៖ នៅរសៀលថ្ងៃទី៩ ខែសីហានេះ ក្រុមគ្រូពេទ្យបានធ្វើសំណាក់ទៅលើបុគ្គលសណ្ឋាគារឡាក់គីស្តារ២ ដើម្បីរកមេរោគកូវីដ១៩ ឬប្រភេទបំប្លែងថ្មី Delta ។ នេះបើយោងតាមសាលាខណ្ឌទួលគោកបានបង្ហោះមុននេះ ។
សូមបញ្ជាក់ថា សណ្ឋាគារ ឡាក់គីស្ដារ២ បានធ្វើការបិទផ្អាកជាបណ្ដោះអាសន្ន ដើម្បីយកសំណាកបុគ្គលិកដែលសង្ស័យឆ្លងវីរុសកូវីដ-១៩ បំប្លែងថ្មី ដែលតា (Delta) នៅសង្កាត់ផ្សារដើមគរ ផ្លូវ៣៣៦ ។ រហូតមកដល់ពេលនេះយើងមិនទាន់ដឹងថា មានអ្នកបុគ្គលិកប៉ុន្មាននាក់ហើយដែលបានរកឃើញកូវីដឡើយ ។
គួរបញ្ជាក់ថា ក្រសួងសុខាភិបាលបានប្រកាសកាលពីថ្ងៃអាទិត្យ ម្សិលមិញនេះ អំពីការរកឃើញករណីឆ្លងជំងឺកូវីដ-១៩ បំប្លែងថ្មី ដែលតា(Delta) ចំនួន៥៨នាក់បន្ថែម ក្នុងនោះមានបុគ្គលិកសុខាភិបាល៤នាក់ ពលករខ្មែរមកពីប្រទេសថៃ និងអ្នកភូមិក្នុងសហគមន៍ នៅក្នុងទឹកដីរាជធានីភ្នំពេញ និងខេត្តចំនួន៨ផ្សេងទៀត ។
ក្រសួងសុខាភិបាលបានបញ្ជាក់ថា «យោងតាមលទ្ធផលខាងលើនេះ បង្ហាញឱ្យយើងឃើញថា វីរុសដែលតា(Delta) បាន និងកំពុងបន្តរាតត្បាតវាយលុកចូលក្នុងសហគមន៍របស់យើង ជាពិសេសខេត្តឧត្តរមានជ័យ រាជធានីភ្នំពេញ សៀមរាប ព្រះវិហារ កំពង់ចាម កំពង់ធំ និងបណ្តាខេត្តមួយចំនួនទៀត » ៕