រាជធានីភ្នំពេញ ៖ លោកជំទាវ ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ បានបញ្ជាក់ថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានអនុញ្ញាតឱ្យប្រើប្រាស់ឧទ្ធម្ភាគចក្រចំនួន២គ្រឿង ដើម្បីដឹកវ៉ាក់សាំង Astra Zeneca ទៅកាន់បណ្តាខេត្តចំនួន៦ ជាប់ព្រំដែនកម្ពុជា-ថៃ ដើម្បីចាប់ផ្តើមចាក់ដូសទី៣ ជូនដល់មន្ត្រីជួរមុខ នៅថ្ងៃទី៨ ខែសីហា ឆ្នាំ២០២១នេះ តែម្តង ។ នេះបើយោងតាមនាយកដ្ឋានព័ត៌មានក្រសួងការពារជាតិបានបង្ហោះមុននេះ ។
លោកជំទាវ ប្រធានគណៈកម្មការ បានបញ្ជាក់បន្ថែមថា ខេត្តទាំងនោះរួមមានខេត្តប៉ៃលិន បាត់ដំបង ឧត្តរមានជ័យ បន្ទាយ មានជ័យ និងខេត្តព្រះវិហារផងដែរ ។ លោកជំទាវ ឱ វណ្ឌឌីន បានបញ្ជាក់បន្ថែមថា វ៉ាក់សាំងទាំងនេះ នឹងត្រូវបើកយុទ្ធនា ការចាក់ដូសទី៣ ជូនក្រុមគ្រូពេទ្យជួរមុខដែលប្រឈមនឹងហានិភ័យនៃការឆ្លងជំងឺកូវីដ១៩ បំប្លែងថ្មី Delta ក្រោយពេលមានពលករខ្មែរត្រឡប់មកពីប្រទេសថៃ ហើយដោយឡែកសម្រាប់ការចាក់ជូនដល់កងទ័ព និងគ្រួសារកងទ័ព នឹងត្រូវរៀបចំចាត់ចែងដោយក្រសួងការពារជាតិ។
ដោយឡែកយុទ្ធនាកាចាក់វ៉ាក់សាំងដូសទី ៣នេះក៏ធ្វើឡើងនៅខេត្តពោធិ៍ នាថ្ងៃទី០៨ ខែសីហា ឆ្នាំ២០២១នេះដែរ ។ ដោយវ៉ាក់សាំងដឹកតាមរថយន្ត ទៅដល់ខេត្តពោធិ៍ សាត់នៅល្ងាចថ្ងៃនេះ។
លោកជំទាវ ឱ វណ្ណឌីន បានបន្ថែមថា ការបញ្ចេញឧទ្ធម្ភាគចក្រដឹកវ៉ាក់សាំងទៅតាមបណ្តាខេត្ត និងការបើកយុទ្ធនាការនៅថ្ងៃស្អែកនេះ សុទ្ធសឹងជាការគិតគូរយ៉ាងច្បាស់លាស់អំពីបញ្ហាសុខភាពរបស់ដល់មន្ត្រីជួរមុខ ក៏ដូចជាប្រជាពលរដ្ឋ ពីសំណាក់សម្ដេចតេជោ ហ៊ុន សែន។
សូមជម្រាបថា កាលម្សិលមិញ សម្តេចតេជោ ហ៊ុន សែន បានបញ្ជាឱ្យគណៈកម្មការជាតិចាក់វ៉ាក់សាំងកូវីដ១៩ ត្រៀមចាក់វ៉ាក់សាំងដូសទី៣ ជូនមន្ត្រីពាក់ ព័ន្ធជួរមុខ នៅខេត្តជាប់ព្រំដែនកម្ពុជា-ថៃជាបន្ទាន់ ខណៈដែលពួកគេប្រឈមនឹងការឆ្លងមេរោគថ្មី Delta ក្រោយពលករជាច្រើនត្រឡប់ពីប្រទេសថៃ។
រាជរដ្ឋាភិបាលកម្ពុជា កាលពីដើមខែសីហា ឆ្នាំ២០២១ បានសម្រេចឲ្យចាក់វ៉ាក់សាំងបង្ការជំងឺកូវីដ១៩ ដូសទី៣ ជូនដល់ប្រជាពលរដ្ឋខ្មែរគ្រប់រូប ដែលបានចាក់ដូស ទី២រួចរាល់ ដើម្បីបង្កើតប្រព័ន្ធការពារដ៏រឹង មាំថែមទៀត នៅក្នុងខ្លួនមនុស្ស ក្នុងការទប់ ទល់នឹងជំងឺកូវីដ១៩ ជាពិសេសឆ្លើយតបនឹងវត្តមានមេរោគកូវីដ១៩ បំប្លែងខ្លួនថ្មី Delta ដែលកំពុងរីករាលដាលយ៉ាងខ្លាំងក្លានៅក្នុងតំបន់។
ការចាក់ដូសទី៣នេះ គឺប្រើប្រាស់វ៉ាក់សាំង AstraZeneca ដែលជាដូសជំរុញសម្រាប់អ្នកដែលបានចាក់វ៉ាក់សាំងចិនស៊ីណូហ្វាម ឬស៊ីណូវ៉ាក់។ជាមួយនឹងការ សម្រេចចាក់ដូសទី៣នេះ សម្ដេចតេជោ ហ៊ុន សែន ក៏បញ្ជាឲ្យស្ថាប័នពាក់ព័ន្ធត្រូវរួមគ្នាខិតខំស្វែងរកទិញវ៉ាក់សាំង AstraZeneca បន្ថែមទៀត ៕