(ភ្នំពេញ)៖ ក្រសួងសុខាភិបាលបានប្រកាសនៅព្រឹកថ្ងៃទី០៤ ខែសីហានេះថា កម្ពុជាបានបន្តរកឃើញអ្នកកើតជំងឺកូវីដ១៩ ដែលជាមេរោគបំប្លែងថ្មី «ដែលតា» ចំនួន៣៦ករណីបន្ថែមទៀត នៅថ្ងៃទី០៣ ខែសីហា ។
តាមការប្រកាសរបស់ក្រសួងសុខាភិបាលនៅថ្ងៃទី៤ សីហានេះថា លទ្ធផលធ្វើតេស្តដោយវិទ្យាស្ថានប៉ាស្ទ័រកម្ពុជា នៅថ្ងៃទី០៣ ខែសីហានេះបានរកឃើញ ករណីឆ្លងវីរុសកូវីដ១៩ បំប្លែងថ្មី B.1.617.2 (Delta)៣៦នាក់ និងស្រី១៦នាក់ ក្នុងនោះបុគ្គលិកសុខាភិបាលចំនួន៨នាក់ ស្រី២នាក់ អ្នកភូមិក្នុងសហគមន៍២៨នាក់ ស្រី១៤នាក់ ។
ករណីរកឃើញមេរោគបំប្លែងថ្មីដែលតាខាងលើ ក្នុងនោះរាជធានីភ្នំពេញ៥នាក់ ឧត្តរមានជ័យ៩នាក់ ខេត្តសៀមរាប១៨នាក់ និងខេត្តកំពង់ធំ៤នាក់ ។
នាព្រឹកថ្ងៃទី០៤ ខែសីហានេះបានបញ្ជាក់ថា គិតចាប់ពីថ្ងៃទី៣១ ខែមីនា ឆ្នាំ២០២១ ដល់ថ្ងៃទី០៣ ខែសីហា ឆ្នាំ២០២១ កម្ពុជាបានរកឃើញអ្នកមានវិជ្ជមានវីរុសកូវីដ១៩ ប្រភេទដែលតា (Delta) លើពលករត្រលប់ពីប្រទេសថៃ អ្នកដំណើរមកតាមយន្តហោះ បុគ្គលិក សុខាភិបាល និងអ្នកភូមិនៅក្នុងសហគមន៍ សរុបទាំងអស់ចំនួន២៦០នាក់ ស្ត្រី ១២៥នាក់ហើយ ៕