រាជធានីភ្នំពេញ ៖ អនុគណៈកម្មការស្រាវជ្រាវជំងឺកូវីដ១៩ បានប្រកាសនៅព្រឹក ថ្ងៃទី០៣ ខែសីហា ឆ្នាំ២០២១នេះថា រកឃើញអ្នកឆ្លង វីរុសកូវីដ-១៩ ចំនួន៨ នាក់ ក្នុងនោះមានស្រី៥នាក់ នៅក្នុងប្រតិបត្តិការស្វែងរក អ្នកសង្ស័យដែលជាប់ពាក់ព័ន្ធជាមួយអ្នកដែលបានឆ្លងវីរុសកូវីដ-១៩ បំប្លែងថ្មី Delta កាលពីយប់ថ្ងៃទី ២ សីហា នៅភូមិតាងួន សង្កាត់កាកាប១ ខណ្ឌពោធិ៍សែនជ័យ ។
សូមបញ្ជាក់ ៖ ក្រសួងសុខាភិបាលបានប្រកាសរកឃើញវីរុសបំប្លែងខ្លួនថ្មី ដែលតា «Delta» លើពលករមកពីថៃ និងពលរដ្ឋសរុបចំនួន១០៩ករណី នៅថ្ងៃទី៣១ កក្កដា និងថ្ងៃ០១ សីហា ឆ្នាំ២០២១ ។
ចំណែកលោកជំទាវឱ វណ្ណឌីន រដ្ឋលេខាធិការក្រសួងសុខាភិបាល និងជាអ្នកនាំពាក្យក្រសួងបានថ្លែងថា បច្ចុប្បន្នអ្នកឆ្លងវីរុសជំងឺកូវីដ-១៩ បំប្លែងថ្មី (Delta) មួយចំនួនមិនដឹងប្រភពឆ្លងមកពីខាងណា ព្រោះថា Delta មានភាពចម្លងលឿន ដូច្នេះបុគ្គលគ្រប់រូបកុំចល័តទៅតំបន់ផ្សេងៗ ។
លោកជំទាវលើកឡើងថា នៅលើពិភពលោកមានការព្រួយបារម្ភខ្លាំងចំពោះប្រភេទ Delta ដោយសារស្ថានភាពរបស់វាមានភាពឆ្លងលឿន ។
បច្ចប្បន្ននៅកម្ពុជាប្រភេទ Delta ឆ្លងក្នុងសហគមន៍ជាដុំៗ ដូច្នេះប្រជាពលរដ្ឋគ្រប់រូបត្រូវមានការប្រុងជាប់ជានិច្ច ហើយអនុវត្តវិធានការរបស់រាជរដ្ឋាភិបាល និងក្រសួងសុខាភិបាល ៕