រាជធានីភ្នំពេញ ៖ រដ្ឋបាលជ្រោយចង្វារបានប្រកាសកាលពីយប់ថ្ងៃទី២ ខែសីហានេះ សម្រេចផ្អាកដំណើរការជាបណ្ដោះអាសន្នផ្សារទំនេីបឡាក់គី មានទីតាំងស្ថិតក្នុងភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩ សម្រាប់រយៈពេល ១៤ថ្ងៃ គិតចាប់ពីថ្ងៃទី០២ ខែសីហា ឆ្នាំ២០២១ រហូតដល់ថ្ងៃទី១៦ ខែសីហា ឆ្នាំ២០២១ ។
រដ្ឋបាលខណ្ឌជ្រោយចង្វារ បានបន្តថា ការផ្អាកដំណើរការជាបណ្តោះអាសន្នផ្សារទំនើបឡាក់គីនេះ គឺក្រោយរកឃើញមានអ្នកជាប់ទាក់ទងនឹងវីរុសកូវីដ១៩ បានចូលទៅទិញទំនិញក្នុងផ្សារមួួយនេះ និងដើម្បីទប់ស្កាត់ការឆ្លងរីករាលដាលនៃជំងឺកូវីដ-១៩មួយនេះ ។
សូមបញ្ជាក់ កាលពីម្សិលមិញនេះដែរ បុគ្គលិកផ្សារឡាក់គីនៅទីតាំងខាងលើនេះក៏បានធ្វើសំណាកទាំងអស់គ្នា ហើយជាលទ្ធផលរកឃើញវិជ្ជមានកូវីដ១៩ ម្នាក់ ។
ជាចុងក្រោយ សូមបងប្អូនដែលបានចូលផ្សារទំនើបឡាក់គី ទីតាំងនៅរង្វង់មូលព្រហ្មជ្រោយចង្វារ រាប់ចាប់តាំងពីថ្ងៃទី៣១ ខែកក្កដា ឆ្នាំ២០២១ សូមមេត្តាតាមដានសុខភាព ហើយបើមានអាការៈមិនស្រួល សូមទៅយកសំណាកជាបន្ទាន់ ៕