រាជធានីភ្នំពេញ ៖ នារសៀលថ្ងៃទី២០ ខែសីហានេះ រដ្ឋបាលរាជធានីភ្នំពេញបានសម្រេចបិទខ្ទប់ ច្រកចេញ និងកំណាត់ផ្លូវមួយចំនួន ដើម្បីទប់ស្កាត់ការរាលដាលមេរោគកូវីដ-១៩ បំប្លែងថ្មី Delta បន្ទាប់ពីក្រសួងសុខាភិបាល បានប្រកាសពីការរកឃើញ៥ករណីក្នុងរាជធានីភ្នំពេញកន្លងមក ។
សេចក្តីសម្រេចទីមួយ រដ្ឋបាលរាជធានីភ្នំពេញសម្រេចបិទខ្ទប់មិនឱ្យមានការចេញ-ចូល នូវច្រកផ្លូវលេខ ៣៧២, ៣៧២Z, និងផ្លូវលេខ ៣៦២ ស្ថិតក្នុងភូមិ៥ សង្កាត់បឹងសាឡាង ខណ្ឌទួលគោក ដែលមានការឆ្លងរាលដាលនៃមេរោគបំប្លែងថ្មី ប្រភេទដែលតា (Delta) សម្រាប់រយៈពេល១៤ថ្ងៃ គឺរហូតដល់ថ្ងៃទី១៦ ខែសីហា ។
សេចក្តីសម្រេចមួយទៀត គឺការបិទខ្ទប់កំណាត់ផ្លូវលេខ ៩៣ ក្នុងភូមិផ្សារតូច សង្កាត់ទួលសង្កែទី១ ខណ្ឌឫស្សីកែវ ការបិទខ្ទប់ គឺចាប់ពីកំណាត់ផ្លូវលេខ ៩៣ ពីចំណុចសាលាបឋមសិក្សាពញាក្រែក រហូតដល់ចំណុចផ្ទេរលេខ១១៦ រួមទាំងលំនៅឋានក្នុងបុរី ខេស៊ី (KC) ស្ថិតក្នុងក្រុមទី៤ ភូមិផ្សារតូច សង្កាត់ទួលសង្កែទី១ ខណ្ឌឫស្សីកែវ រយៈពេល៧ថ្ងៃ ពោល គឺរហូតដល់ថ្ងៃទី៩ ខែសីហា ។
ករណីបិទខ្ទប់នេះដែរ គឺដើម្បីទប់ស្កាត់ការរាលដាលកូវីដ-១៩ ជាពិសេសមេរោគបំប្លែងថ្មីដែលតា ឆ្លងចូលក្នុងសហគមន៍យើងហើយ ហើយអាជ្ញាធរក៏បានស្រាវជ្រាវ និងធ្វើតេស្តទៅលើពលរដ្ឋនៅទីតាំងទាំងនោះផងដែរ ៕