រាជធានីភ្នំពេញ ៖ នារសៀលថ្ងៃទី០២ ខែសីហានេះ រដ្ឋបាលក្រុងភ្នំពេញសម្រេចបិទខ្ទប់កំណាត់ផ្លូវលេខ៩៣ ក្នុងភូមិផ្សារតូច សង្កាត់ទួលសង្កែទី១ ខណ្ឌឫស្សីកែវ ដោយសង្ស័យថា មានការពាក់ព័ន្ធមេរោគបំប្លែងថ្មី Delta ដើម្បីស្រាវជ្រាវ និងទប់ស្កាត់ការឆ្លងរាលដាលក្នុងសហគមន៍ ។
តាមសេចក្ដីប្រកាសរបស់រដ្ឋបាលរាជធានីភ្នំពេញខាងលើបានបញ្ជាក់ថា ត្រូវបានការបិទខ្ទប់មិនឱ្យមានការចេញ-ចូលចំពោះកំណាត់ផ្លូវលេខ៩៣ ពីចំណុចសាលាបឋមសិក្សា ពញាក្រែក រហូតដល់ចំណុចផ្ទះលេខ ១១៦ រួមទាំងលំនៅឋានក្នុងបុរី ខេស៊ី (KC) ស្ថិតក្នុងក្រុមទី៤ ភូមិផ្សារតូច សង្កាត់ទួលសង្កែទី១ ខណ្ឌឬស្សីកែវ រាជធានីភ្នំពេញ ដែលមានការសង្ស័យជាប់ពាក់ព័ន្ធមេរោគបំប្លែងខ្លួនថ្មី ប្រភេទ ដែលតា (Delta) សម្រាប់រយៈពេល ០៧ (ប្រាំពីរ) ថ្ងៃ គិតចាប់ពីម៉ោងសូន្យ នាថ្ងៃទី៣ ខែសីហា ឆ្នាំ២០២១ ដល់ ថ្ងៃទី៩ ខែសីហា ឆ្នាំ២០២១ រហូតការស្រាវជ្រាវត្រូវបានបិទបញ្ចប់ ដើម្បីទប់ស្កាត់ការឆ្លងរាលដាលនូវមេរោគបំប្លែង ខ្លួនថ្មី ប្រភេទដែលតា (Delta) នៅក្នុងសហគមន៍ ។
ជាក់ស្តែង ពេលនេះរាជធានីភ្នំពេញបានរកឃើញជាបន្តបន្ទាប់ និងបានសម្រេចបិទខ្ទប់តំបន់មួយក្នុងភូមិសាស្រ្ត ផ្សារទួលសង្កែរ ក្រោយពីរកឃើញមានការពាក់ព័ន្ធវីរុសកូវីដ១៩បំប្លែងថ្មីនេះ ។
សូមបញ្ជាក់ ៖ កាលពីយប់កាលពីថ្ងៃទី១ ខែសីហានេះ ក្រសួងសុខាភិបាលបានប្រកាសករណីរកឃើញវិរុសបំប្លែងខ្លួនថ្មីដែលតា «Delta» លើពលករមកពីថៃ និងពលរដ្ឋសរុបចំនួន១០៩ ករណី នៅថ្ងៃ៣១ កក្កដា និងថ្ងៃ០១ សីហាឆ្នាំ២០២១ ។
ក្នុងនោះវីរុសបំប្លែងថ្មី ដែលតា ៥ករណី រកឃើញនៅពេទ្យចំនួនពីរនៅរាជធានីភ្នំពេញ ដោយក្នុងនោះ១ករណីលើពលករខ្មែរមកពីប្រទេសថៃ និងកាលពីថ្ងៃ ០១ សីហា មានមួយករណីលើអ្នកជំងឺមកមន្ទីរពេទ្យកាល់ម៉ែត្រ និងពីរករណីទៀតជាបុគ្គលិកអនាម័យម្នាក់ និងអ្នកជំងឺផ្នែកសង្គ្រោះបន្ទាន់ម្នាក់នៅមន្ទីរពេទ្យមិត្តភាពខ្មែរ-សូវៀត និងករណីទី ៥ គឺជាអ្នកដំណើរបរទេសពីប្រទេសម៉ាឡេស៊ីម្នាក់ ៕