Join with Health.com.kh on Telegram

ជំងឺ​ដែល​អាច​ជះ​ឥទ្ធិពល​ទៅ​ជើង​របស់​អ្នក អាច​ទាក់ទង​ទៅ​នឹង​បញ្ហា​បេះដូង (heart trouble)​។​នេះ​បើ​យោង​ទៅ​តាម​ការ​ស្រាវជ្រាវ​មួយ​បាន​លើក​ឡើង​ថ្មី​ៗ​នេះ ។

សេចក្តីរាយការណ៍​មួយ​មក​ពី​មូលនិធិ Vascular Disease Foundation និង​សម្ព័​ន្ឋ PAD Coalition បានអោយ​ដឹង​ថា ជនជាតិ​អា​មេ​រិ​ក​ប្រហែលជា ៩ លាន​នាក់ ដែល​មាន​អាយុ​ចាស់​ជាង ៥០ ឆ្នាំ កំពុង​មាន​ផ្ទុក​ជំងឺ​សរសៃឈាម​ផ្នែក​ខាង​ចុង​( peripheral arterial disease ឬ​PAD), ដែល​ធ្វើ​អោយ​ពួក​គេ​ទាំងនោះ​បង្កើន​ការ​ប្រឈម​មុខ​ទៅ​នឹង​ជំងឺ​គាំងបេះដូង (heart attack) ។ ប៉ុន្តែ ប្រជាជន​ជា​ច្រើន​មិន​បានដឹង​ថា ពួក​គេ​កំពុង​តែ​ស្ថិត​ក្នុង​ស្ថានភាព​បែប​នេះនោះ​ទេ ។ ជំងឺ PAD កើតឡើង​នៅ​ពេល​ដែល​សរសៃឈាម​អារ​ទែ​រ (arteries) ដែល​នៅ​ក្នុង​ជើង​ចាប់ផ្តើម​រួម​តូច ចង្អៀត ឬ​ក៏​ស្ទះ (clogged) ដោយសារ​តែ​ជាតិ​ខ្លាញ់ (fatty deposits) ។

ការ​កាត់​បន្ថយ​លំហូរ ឬ ការ​ដឹកនាំ​ឈាម (blood flow) ទៅ​ចិញ្ចឹម​ជើង​អាច​បណ្តាល​អោយ​មានការ​ឈឺចាប់​ទៅ​លើ​សាច់ដុំ​នៅ​ពេល​ដើរ (pain when walking), មិន​អាច​ជ្វើ​ចលនា​បាន ឬ ពិការ (disability), ការ​កាត់​ជើង​ចោល (amputation) និង​ធ្វើ​អោយ​ជីវិត​របស់​ពួក​គេ​បាត់បង់​នូវ​ភាព​ស្រស់ស្រាយ សប្បាយចិត្ត ។ ប្រសិនបើជា​សរសៃឈាម​ក្រហម​ទាំងនោះ​ត្រូវ​បាន​រាំងស្ទះ​នៅ​តំបន់​ជើង​, នោះ​វា​ហាក់ដូចជា​ស្ទះ​សរសៃឈាម​ដទៃ​ទៀត​នៅ​ក្នុង​ខ្លួន​របស់​អ្នកផង​ដែរ ។ រោគ​សញ្ញា​នៃ​ជំងឺ​ស្ទះ​សរសៃឈាម​ផ្នែក​ខាង​ចុង​( PAD) រួម​មាន ៖

-​ហេវ​ហត់​
-​ធ្ងន់ៗ​ជើង​
-​អស់កម្លាំង​
-​ឈឺចាប់​នៅ​ភ្នែកគោ​,​ ភ្លៅ​ ឬ​ សាច់ដុំ​គូទ​ ដែល​កើតឡើង​អំឡុង​ពេល​អ្នក​ធ្វើ​ចលនា​ ឬ​ សកម្មភាព​ផ្សេងៗ​,​ ប៉ុ​ន្ត​ការ​ឈឺចាប់​នឹង​បាត់​ទៅ​វិញ​នៅ​ពេល​ដែល​អ្នក​ឈប់​សំរាក​ ឬ​ ផ្អាក​សកម្មភាព​ទាំងនោះ​
-​ឈឺ​នៅ​ជើង​ផ្ទាល់​ ឬ​ មេជើង​នៅ​ពេល​អ្នក​សំរាក​,​ ដែល​ជា​ទូទៅ​ ធ្វើ​អោយ​អ្នកជំងឺ​មិន​អាច​គេង​លក់​បាន​
-​ស្បែក​ឡើង​មាន​ដំបៅ​,​ រលួយ​តំបន់​ជើង​ ឬ​ ម្រាមជើង​ហើយ​ក្រ​ជា​សះស្បើយ​។​

វេជ្ជបណ្ឌិត Joseph Caporusso, ប្រធាន PAD Coalition បាន​និយាយ​ថា ៖ “​ជា​រឿយ​ៗ, អ្នកជំងឺ​តែង​មាន​អារម្មណ៍​មិនសូវ​សុខ​ស្រួល​នៅ​នឹង​ជើង​របស់​ពួក​គាត់ ឬ មាន​ដំបៅ​ដែល​មិន​ងាយ​នឹង​ជា​សះស្បើយ​ៗ, ដែល​នេះ​គឺ​គ្រាន់តែ​ជា​មូលហេតុ​មួយ​នៃ​ភាព​ចាស់ជរា របស់​ពួក​គាត់​ប៉ុន​នោះ​, ប៉ុន្តែ វា​ក៏​អាច​ជា​សញ្ញា​នៃ​ភាព​ធ្ងន់ធ្ងរ​នៃ​ជំងឺ​ផង​ដែរ ។

លោក Caporusso បាន​បន្ថែម​ថា ៖ “​ការ​រក​ឃើញ​ជំងឺ​នេះ និង បាន​ទទួល​ការ​ព្យាបាល​ត្រឹមត្រូវ​ភ្លាម​ៗ និង ទាន់​ពេល​វា​លា​, យើង​អាច​កាត់​បន្ថយ​នូវ​បញ្ហា ឬ ផលវិបាក​នានា​ដែល​អាច​បណ្តាល​មក​ពី​ជំងឺ PAD​ព្រមទាំង​អាច​ពង្រឹង​នូវ​សុខភាព​បេះដូង​របស់​ប្រជាជន​ទាំងអស់​។
ប្រជាជន​ដែល​មាន​អាយុ​ចាប់ពី ៥០ ឆ្នាំ​ឡើង​ទៅ​កំពុង​តែ​ប្រឈម​មុខ​ជំងឺ PAD ហើយ​រិ​ត​តែ​ធ្ងន់ធ្ងរ​ជាង​នេះ​ទៅ​ទៀត សំរាប់​អ្នក​ដែល​មាន ៖

-​ការ​ជក់បារី​
-​ជំងឺ​ទឹកនោមផ្អែម​
-​ជំងឺលើសឈាម​
-​កំរិត​កូ​ឡេ​ស្តេ​រ៉ូ​ល​ខ្ពស់​
-​ឬ​ អ្នក​ដែល​មាន​ប្រវត្តិ​ជំងឺ​សរសៃឈាម​បេះដូង​ ឬ​ ដាច់​សរសៃឈាម​ខួរក្បាល​។​
អ្នក​ដែល​គួរតែ​ធ្វើតេស្ត​ ដើម្បី​រក​ជំងឺ​ PAD​ រួម​មាន​
-​អ្នក​ដែល​មាន​អាយុ​ ៧០​ ឆ្នាំ​ ឬ​ ចាស់​ជាង​នេះ​
-​យុវវ័យ​ដែល​មាន​រោគ​សញ្ញា​នៃ​ជំងឺ​ PAD
-​អ្នកមាន​អាយុ​ក្មេង​ជាង​ ៥០​ ឆ្នាំ​ ដែល​មាន​ជំងឺ​ទឹកនោមផ្អែម​
-​អ្នកមាន​អាយុ​ ៥០​ ឆ្នាំ​ ដែល​មាន​ប្រវត្តិ​នៃ​ការ​ជក់បារី​ ។​

ការ​ធ្វើតេស្ត​ដើម្បី​រក​ PAD,​ អ្នកជំនាញ​ផ្នែក​សុខភាព​នឹង​ធ្វើការ​ប្រៀបធៀប​សម្ពាធ​ឈាម​ (blood​ pressure)​ នៅ​កជើង​ (ankles)​ ជាមួយនឹង​សម្ពាធ​ឈាម​នៅ​នឹង​ដៃ​ (arms)​ ។