ដំបៅ ឬពងបែកមាត់ ជារឿយៗកើតលើអ្នក ដែលខ្សោះជាតិទឹក និងកង្វះអនាម័យមាត់ធ្មេញ។ ជាធម្មតា វាអាចបាត់ទៅវិញដោយខ្លួនឯង ទោះបីជាគ្មាន ការព្យាបាលក៏ដោយ ប៉ុន្តែ បើចង់ឲ្យវាឆាប់ជា និងមិនសូវឈឺចាប់ អ្នកអាចសាកល្បង វិធីសាស្រ្តខាងក្រោម។
ទោះបីជាគេ មិនបានដឹងច្បាស់ អំពីមូលហេតុ នៃអាការៈជំងឺនេះ ប៉ុន្តែ បញ្ហាស្រ្តេស ការអាលែកស៊ីចំណីអាហារ កង្វះអនាម័យ ខ្វះជាតិទឹក ប្រព័ន្ធការពាររាងកាយខ្សោយ ការឆ្លងមេរោគ និងការជក់បារី អាចជាដើមចម ដែលបណ្តាលឲ្យអ្នក កើតដំបៅមាត់។
ប្រទាលកន្ទុយក្រពើ ពិតជាភ្នាក់ងារ ប្រឆាំងការរលាកដ៏អស្ចារ្យ និងមានប្រសិទ្ធភាពបំផុត ក្នុងការព្យាបាលរបួស ការរលាក និងការឈឺចាប់ដោយសារ ការពងបែកមាត់នេះ។
បើអ្នកមានប្រទាលកន្ទុយក្រពើ នៅក្នុងផ្ទះខ្លួនឯង អ្នកគ្រាន់តែកាត់ ស្លឹកវាមួយធាង រួចចៀរយកតែជាតិរំអិល ដាក់ក្នុងពែងមួយ។
១. លាបប្រទាលកន្ទុយក្រពើនេះ ទៅលើកន្លែងដែលមានបញ្ហា ឲ្យបានញឹកញាប់ តាមដែលអាចធ្វើទៅបាន។
២. ក្រឡុក ឬលាយជាមួយនឹងទឹក ដើម្បីយកមកខ្ពុរមាត់ ១ ថ្ងៃ ៣ ដង។
៣. យកប្រទាលនេះ ធ្វើទឹកប្រទាលកន្ទុយក្រពើ ដើម្បីញ៉ាំរាល់ថ្ងៃ៕