អំឡុងពេលគាំងបេះដូង រោគសញ្ញាអាចមានរយៈពេល ៣០ នាទី ឬយូរជាងនេះ ហើយវាមិនបាត់ តាមរយៈការសម្រាក ឬប្រើថ្នាំធម្មតាៗនោះទេ។ ដូច្នេះ ប្រសិនបើអ្នកសង្ស័យថា អ្នកមានជំងឺគាំងបេះដូង ត្រូវប្រញាប់ប្រាប់អ្នកជុំវិញខ្លួន រួចទៅមន្ទីរពេទ្យជាបន្ទាន់។
យ៉ាងណាមិញ ក្នុងករណីមួយចំនួន រោគសញ្ញាអាចចាប់ផ្តើម ក្នុងកម្រិតស្រាល ដែលធ្វើឲ្យអ្នកដឹងមុនបាន ប៉ុន្តែ ក្នុងករណីខ្លះទៀត វាមានសភាពធ្ងន់ធ្ងរ ហើយពិបាកជួយសង្រ្គោះ ឲ្យទាន់ពេលវេលាណាស់។
រោគសញ្ញាមួយចំនួន នៃជំងឺគាំងបេះដូង ដែលអាចកើតមានឡើង ៖
• មានអារម្មណ៍ថា មិនស្រួលក្នុងខ្លួន ជាពិសេស ត្រង់ដើមទ្រូង
• ឡើងសម្ពាធក្នុងដើមទ្រូង ឈឺក្នុងទ្រូង ឬក្រោមឆ្អឹងទ្រូង
• ការមិនស្រួលបែបនេះ រាលដាលទៅខាងក្រោយខ្នង ថ្គាម បំពង់ក ឬដៃ
• មានអារម្មណ៍ថា តឹង មិនរំលាយអាហារ ឬឈ្លក់
• ពេលខ្លះ មានអារម្មណ៍ថា ក្រហាយដើមទ្រូង
• បែកញើសស្អិត ចង្អោរ ក្អួត ឬវិលមុខ
• ខ្សោយ អស់កម្លាំង អន្ទះអន្ទែង
• ដកដង្ហើមបានខ្លីៗ
• ចង្វាក់បេះដូងលោតញាប់ ឬខុសពីធម្មតា។
សម្រាប់មនុស្សមួយចំនួន ជំងឺគាំងបេះដូងនេះ មិនលេចចេញជារោគសញ្ញាអ្វីនោះទេ ដែលគេហៅថា គាំងបេះដូងស្ងប់ស្ងាត់។ វាច្រើនកើតឡើង ចំពោះអ្នកជំងឺទឹកនោមផ្អែម។
បើអ្នកសង្ស័យថា មានជំងឺគាំងបេះដូង ដាច់ខាត កុំបង្អង់យូរ ត្រូវប្រញាប់ទៅពេទ្យ ឲ្យបានលឿន តាមដែលអាចធ្វើទៅបាន។ ការព្យាបាលទាន់វេលា អាចកាត់បន្ថយការខូចខាតបេះដូង និងអាចជួយសង្រ្គោះអាយុជីវិត របស់អ្នកបាន៕