រាជធានីភ្នំពេញ ៖ ក្រសួងសុខាភិបាលបានប្រកាស នៅព្រឹកថ្ងៃទី៧ខែមេសា ឆ្នាំ២០២១ថា បានរកឃើញអ្នកឆ្លងជំងឺកូវីដ១៩ ថ្មីបន្ថែមចំនួន៩១នាក់ និងបានព្យាបាលជាសះស្បើយចំនួន៣០នាក់ ។
ក្រសួងបន្តថា អ្នកដែលរកឃើញឆ្លងជំងឺកូវីដ១៩ថ្មីនេះមាន៩០នាក់ ពាក់ព័ន្ធនឹងព្រឹត្តិការណ៍សហគមន៍២០ កុម្ភៈ និង១នាក់ជាអ្នកដំណើរមកពីក្រៅប្រទេស ។
ចំណែកអ្នកព្យាបាលជាសះស្បើយចំនួន២៩នាក់ ជាអ្នកពាក់ព័ន្ធនឹងព្រឹត្តិការណ៍សហគមន៍ និង១នាក់ជាអ្នកដំណើរមកពីក្រៅប្រទេស ដែលលអ្នកទាំងនោះត្រូវបានអនុញ្ញាតឲ្យចេញពីមន្ទីពេទ្យបន្ទាប់ពីធ្វើតេស្តរកមេរោគកូវីដ១៩មិនឃើញ ប៉ុន្តែអ្នកទាំងនោះត្រូវធ្វើចត្តាឡីស័កនៅផ្ទះបន្តផងដែរ ។
ក្រសួងក៏បានឲ្យដឹងថា ថ្ងៃនេះរកឃើញអ្នកឆ្លងកូវីដ១៩នៅរាជធានីភ្នំពេញមានចំនួនច្រើនជាងបណ្តាខេត្តមួយចំនួន ។
ក្រសួងបានលើកឡើងយ៉ាងដូច្នេះថា រកឃើញអ្នកឆ្លងថ្មី ៩១នាក់ទៀត និងជាសះស្បើយ៣០នាក់ ក្នុងនោះករណីឆ្លងសហគមន៍ ៩០នាក់ និងអ្នកដំណើរពីបរទេស០១នាក់ ។
អ្នកឆ្លងជំងឺកូវីដ១៩មាន ៖ រាជធានី ភ្នំពេញ៧៨នាក់ ខេត្តតាកែវ ៤នាក់ ខេត្តស្វាយរៀង៣នាក់ ខេត្តត្បូងឃ្មុំ១នាក់ ខេត្តពោធិ៍សាត់ ១នាក់ ខេត្តកំពង់ចាម១នាក់ ខេត្តប៉ៃលិន១នាក់ ខេត្តព្រៃវែង១នាក់ ។
ក្រសួងបានលើកឡើងថា គិតត្រឹមព្រឹក ថ្ងៃទី០៧ ខែមេសា ឆ្នាំ២០២១ ចំនួនអ្នកជំងឺកូវីដ១៩សរុបនៅទូទាំង ២៩១៥ នាក់ អ្នកជាសះស្បើយ១៨២៤ នាក់ និងអ្នកកំពុងព្យាបាល១០៦៤ នាក់ ខណៈ អ្នកស្លាប់ដោយជំងឺកូវីដ១៩ចំនួន ២២ នាក់៕