រាជធានី​ភ្នំពេញ ៖ ក្រសួងសុខាភិបាល​បាន​លើក​ឡើង​ថា បុរស​ជនជាតិ​ខ្មែរ​ម្នាក់​ទៀត បាន​ស្លាប់​បាត់បង់​ជីវិត​ដោយសារ​ជំងឺ​កូ​វី​ដ​១៩ វាយលុក​លឿន សរុប​អ្នក​ស្លាប់​កើន​ដល់​៨​នាក់​ហើយ ។

យោង​តាម​សេចក្តី​ប្រកាស​ព័ត៌មាន​មាន​របស់​ក្រសួងសុខាភិបាល នៅ​ថ្ងៃ​ទី​២៦ មីនា ឆ្នាំ​២០២១​បាន​ឲ្យ​ដឹង​ថា ករណី​ស្លាប់​បុរស​ជនជាតិ​ខ្មែរ អាយុ ៥៥​ឆ្នាំ ដោយសារ​ជំងឺ​កូ​វី​ដ​-១៩​នៅ​ខេត្តកណ្តាល ។

ក្រសួងសុខាភិបាល​បាន​បញ្ជាក់​ថា យោង​តាម​របាយការណ៍​ពី​មន្ទីរពេទ្យ​មិត្តភាព​ខ្មែរ -​សូ​វៀត បានឱ្យ​ដឹង​ថា បុរស​ជនជាតិ​ខ្មែរ​អាយុ​៥៥​ឆ្នាំ មាន​អាសយដ្ឋាន​នៅ​ភូមិ​ក្តី​ចាស់ ឃុំ ព្រែក​លួង ស្រុក​ខ្សាច់កណ្តាល ខេត្តកណ្តាល បាន​ស្លាប់​បាត់បង់​ជីវិត​ដោយសារ​ជំងឺ​វី​ដ​-១៩ នា​ថ្ងៃ​ទី​២៥ ខែមីនា ឆ្នាំ​២០១១ វេលា​ម៉ោង ១៦:០០​នាទី​រសៀល ។

ក្រសួង​បាន​លើក​ឡើង​ថា បុរស​ខាងលើ​នេះ បាន​ធ្លាក់ខ្លួន​ឈឺ​ដោយ​ក្ដៅខ្លួន និង​ក្អក​ប្រហែលជា ៣ ទៅ ៤​ថ្ងៃមុន​ស្លាប់ ដោយ​សភាព​កាន់តែ​ធ្ងន់​ទៅ​ក៏​បាន​ចូល​សម្រាក​ព្យាបាល​នៅ​មន្ទីរពេទ្យ​មិត្តភាព​ខ្មែរ -​សូ​វៀត នៅ​ថ្ងៃ​ទី​២៥ ខែមីនា ឆ្នាំ​២០២១ វេលា​ម៉ោង ១៥:៣០​រសៀល ក្នុង​ស្ថានភាព​មាន​អាកា​រៈ​ហត់​ដង្ហក់​ខ្លាំង ដែល​ជា​សញ្ញា​នៃ​វិបត្តិ​ផ្លូវដង្ហើម​ស្រួច​ស្រាវ​ធ្ងន់ធ្ងរ ។

ដោយ​ការ​សង្ស័យ ក្រុម​គ្រូពេទ្យ បាន​យក​វត្ថុ​សំណាក​ទៅ​វិភាគ​ភ្លាម​ៗ​នៅ​ពេល​ចូល​មក​ដល់​មន្ទីរពេទ្យ ហើយ​លទ្ធផល​វិភាគ​វត្ថុ​សំណាក​របស់​គាត់​បាន​បង្ហាញ​ថា មាន​វិជ្ជមាន​វីរុស​កូ​វី​ដ​-១៩ នៅ​វេលា​ម៉ោង ២៣:០០​យប់​នា​ថ្ងៃ​ដដែល ។ ដោយសារ​ស្ថានភាព​ធ្ងន់ធ្ងរ​ពេក​បែប​នេះ ក្រុម​គ្រូពេទ្យ​ក្រៅពី ផ្តល់​ការ​ព្យាបាល​តាម​បច្ចេកទេស ក៏​បាន​ប្រើប្រាស់​ម៉ាស៊ីន​ជំនួយការ​ដកដង្ហើម​បន្ថែម​ភ្លាម​ៗ តែ​ជា​អកុសល ក្នុង​រយៈពេល​តែ​កន្លះ ម៉ោង​ប៉ុណ្ណោះ គាត់​ក៏​បាន​ធ្វើ​មរណៈកាល​នៅ​ថ្ងៃ​ទី​២៥ ខែមីនា ឆ្នាំ​២០២១​ទៅ ។

ក្រសួង​បាន​បន្ត​ថា តាម​ការ​សន្និដ្ឋាន​របស់​ក្រុម​គ្រូពេទ្យ បុរស​វ័យ​៥៥​ឆ្នាំ​ខាងលើ​នេះ គឺ​បាន​ស្លាប់​បាត់បង់​ជីវិត ដោយសារ​ជំងឺ​កូ​វី​ដ​-១៩ វៃ​លុក​សួត​សាហាវ​លឿន និង​ធ្ងន់ធ្ងរ​ខ្លាំង​ពេក ។ ក្រសួងសុខាភិបាល សូម​ចូលរួម​ចំណែក​សោកស្តាយ​ជា​ពន់ពេក និង​សូម​ចូលរួម​មរណទុក្ខ​យ៉ាង​ក្រៀមក្រំ​ជាទី​បំផុត​ជាមួយ​ក្រុម​គ្រួសារ​សព ។

សូម​ជម្រាប​ថា បើ​តាម​ការ​ឲ្យ​ដឹង​បុរស​ដែល​ស្លាប់​ដោយសារ​ជំងឺ​កូ​វី​ដ​១៩ ជា​ជន​ទី​៨​នេះ​ជា​មន្ត្រី​នគ​បាលច​រាច​ណ៍​រាជធានី​ភ្នំពេញ ៕