រាជធានី​ភ្នំពេញ ៖ ក្រសួងសុខាភិបាល​បាន​ប្រកាស​នៅ​ព្រឹក​ថ្ងៃ​ទី​១៩ ខែមីនា ឆ្នាំ​២០២១​ថា បាន​រក​ឃើញ​អ្នក​ឆ្លង​ជំងឺ​កូ​វី​ដ​១៩ ថ្មី​បន្ថែមចំនួន​៣៧​នាក់ សុទ្ធតែ​ពាក់ព័ន្ធ​នឹង​ព្រឹត្តិការណ៍​សហគមន៍​២០ កុម្ភៈ​ទាំងអស់ និង​ជា​សះស្បើយ​មាន​១៩​នាក់ ។

ក្រសួងសុខាភិបាល​បាន​ឲ្យ​ដឹង​ទៀត​ថា អ្នក​ដែល​ឆ្លង​សុទ្ធតែ​ពាក់ព័ន្ធ​នឹង​ព្រឹត្តិការណ៍​សហគមន៍ ២០​កុម្ភៈ ភាគច្រើន​ជា​ជនជាតិ​ចិន និ​ន​ជនជាតិ​ខ្មែរ នៅ​រាជធានី​ភ្នំពេញ ខេត្ត​ព្រះ​សីហ​នុ ។

ចំណែក​អ្នក​ព្យាបាល​ជា​សះស្បើយ​ចំនួន​១៩​នាក់ នៅ​រាជធានី​ភ្នំពេញ និង​ខេត្ត​ព្រះ​សីហ​នុ ។

សូម​ជម្រាប​ថា កម្ពុជា​រក​ឃើញ​អ្នក​ឆ្លង​ជំងឺ​កូ​វី​ដ​១៩ សរុប​នៅ​ទូ​ទាំង​ប្រទេស​ចំនួន​១៥៧៨​នាក់ អ្នក​ព្យាបាល​ជា​សះស្បើយ​ចំនួន​៩១៧​នាក់ និង​អ្នក​កំពុង​សម្រាក​ព្យាបាល​ចំនួន​៦៥៨​នាក់ ស្លាប់​១​នាក់ ។

ពាក់ព័ន្ធ​នឹង​ជំងឺ​កូ​វី​ដ​១៩ ប្រមុខ​រាជរដ្ឋាភិបាល​បាន​អំពាវនាវ​ហើយ​អំពាវនាវ​ទៀត ឲ្យ​ប្រជាពលរដ្ឋ​គោរព​វិធានការ​សុខាភិបាល​ពិសេស​«៣​កុំ និង​៣​ការពារ​» ៕