រាជធានីភ្នំពេញ ៖ ក្រសួងសុខាភិបាលបានប្រកាសនៅថ្ងៃទី១០ មីនា ឆ្នាំ២០២១នេះថា បានរកឃើញអ្នកឆ្លងជំងឺកូវីដ១៩ថ្មី ចំនួន៦៤នាក់បន្ថែមទៀត ពីព្រឹត្តិការណ៍សហគមន៍ ខណៈព្យាបាលជាសះស្បើយចំនួន១១នាក់ ។
ក្រសួងបានឲ្យដឹងថា អ្នកដែលឆ្លងភាគច្រើនជាជនជាតិចិន ខ្មែរ ។ ក្រសួងថា រកឃើញករណីឆ្លងថ្មីចំនួន៦៤នាក់បន្ថែមទៀត មានរាជធានីភ្នំពេញ២៦នាក់ ខេត្តព្រះសីហនុ២នាក់ ខេត្តកណ្ដាល៣០នាក់ ខេត្តព្រៃវែង៥នាក់ និងខេត្តសៀមរាប១នាក់ ។
ក្រសួងបានលើកឡើងថា អ្នកកើតកូវីដ១៩ ក្នុងចំណោម៦៤នាក់មាន២៩នាក់ ស្ថិតនៅក្នុងស្រុកកោះធំ ខេត្តកណ្តាល ។
ដោយឡែក ក្រសួងបានឲ្យដឹងថា អ្នកដែលជាសះស្បើយចំនួន១១នាក់ សុទ្ធតែឆ្លងពីព្រឹត្តិការណ៍សហគមន៍២០ កុម្ភៈ នៅរាជធានីភ្នំពេញ ។
ក្រសួងសុខាភិបាលបានឲ្យដឹងថា មកដល់ពេលនេះ រកឃើញអ្នកឆ្លងជំងឺកូវីដ១៩ សរុបចំនួន១១២៤នាក់ និងព្យាបាលជាសះស្បើយចំនួន៥៤៩នាក់ និងកំពុងសម្រាកព្យាបាលចំនួន៥៧៤នាក់ ៕