រាជធានី​ភ្នំពេញ ៖ ក្រសួងសុខាភិបាល​បាន​ប្រកាស​នៅ​ព្រឹក ថ្ងៃ​ទី​២១ ខែកុម្ភៈ ឆ្នាំ​២០២១​នេះ រក​ឃើ​អ្នក​ឆ្លង​ជំងឺ​កូ​វី​ដ​១៩ ថ្មី​ចំនួន​១៧​នាក់​បន្ថែម​ទៀត ដែល​ក្នុង​នោះ​មាន​ករណី​វិជ្ជមាន​ក្នុង «​ព្រឹត្តិការណ៍​សហគមន៍ ២០ កុម្ភៈ​» មាន​ចំនួន​១៥​នាក់ និង​មាន​ករណី​ជា​សះស្បើយ​អ្នកជំងឺ​កូ​វី​ដ​១៩ ចំនួន​៣​នាក់​ដែរ ។

ក្រសួងសុខាភិបាល​បាន​បញ្ជាក់​ថា អ្នក​ឆ្លង​កូ​វី​ដ​១៩​ថ្មី ទាំង​១៧​នាក់ ខាងលើ​រួម​មាន ៖ ជនជាតិ​ឆេ​ក​ម្នាក់ ដែល​អ្នក​ធ្វើ​ដំណើរ​មក​ពី​ប្រទេស​ឆេ​ក បន្ត​ជើងហោះហើរ​មក​ពី​កូរ៉េ មក​ដល់​កម្ពុជា​នៅ​ថ្ងៃ​ទី ៧ ខែ​កម្ភៈ​នេះ និង​ជនជាតិ​ចិន​ចំនួន​១៤​នាក់ និង​វៀតណាម​ម្នាក់ ដែល​ជា​អ្នក​ពាក់ព័ន្ធ​នឹង «​ព្រឹត្តិការណ៍​សហគមន៍ ២០​កុម្ភៈ​» ហើយ​បុរស​ជនជាតិ​ខ្មែរ​ម្នាក់ ដែល​បាន​ធ្វើ​ដំណើរ​មក​ពី​ប្រទេស​ថៃ ។

ចំពោះ​អ្នកជា​សះស្បើយ​៣​នាក់ ខាងលើ​មាន ៖ បុរស​ជនជាតិ​នី​ហ្សេ​រី​យ៉ា​ម្នាក់ និង​ស្ត្រីជន​ជាតិចិន​ម្នាក់ ដែល​ធ្វើ​ដំណើរ​មក​ពី​ក្រៅប្រទេស និង​ស្ត្រីជន​ជាតិខ្មែរ​ម្នាក់ ដែល​ជា​ពលករ​ធ្វើ​ដំណើរ​មក​ពី​ប្រទេស​ថៃ ។

ក្រសួងសុខាភិបាល​បន្ត​ថា ដើម្បី​ទប់ស្កាត់​ការ​ចម្លង​បន្ត​នូវ​វីរុស​កូ​វី​ដ​១៩ ក្នុង​សហគមន៍​ទ្រង់ទ្រាយ​ធំ ក្រសួង​បាន​អំពាវនាវ​ដល់​ប្រជាពលរដ្ឋ ចូលរួម​អនុវត្តន៍​វិធានការ​ការពារ​ខ្លួន​ឲ្យ​បាន​ខ្ជាប់ខ្ជួន តាម​ការ​ណែនាំ​របស់​សម្តេច​តេ​ជោ ហ៊ុន សែន គឺ​ត្រូវ​អនុវត្តន៍​នូវ​វិធានការ ៣​ការពារ និង​៣​កុំ ត្រូវ​ចូលរួម​ធ្វើ​ច​ត្តា​ឡី​ស័ក​ឲ្យ​បាន​ត្រឹមត្រូវ ហើយ​អ្នក​ពាក់ព័ន្ធ​១៤​ថ្ងៃ មុន​ព្រឹត្តិការណ៍​សហគមន៍ ២០ កុម្ភៈ ត្រូវ​មក​ធ្វើតេស្ត នៅ​មណ្ឌល​សុខភាព​ចាក់​អង្រែ ត្រូវ​ចូលរួម​ផ្តល់​ព័ត៌មាន​បុគ្គល​ដែល​ជាប់​ពាក់ព័ន្ធ​ដោយ​ផ្ទាល់ និង​ប្រយោល​នៃ​ព្រឹត្តិការណ៍​សហគមន៍​២០ កុម្ភៈ បើ​មិន​ចាំបាច់​សូម​នៅផ្ទះ និង​មិន​ត្រូវ​រើសអើង​អ្នក​ដែល​ឆ្លង​កូ​វី​ដ​១៩ នោះ​ឡើយ ។

គិត​ត្រឹម​ម៉ោង​៧​និង​០០​នាទី​ព្រឹក ថ្ងៃ​ទី​២១ ខែកុម្ភៈ ឆ្នាំ​២០២១​នេះ កម្ពុជា​បាន​រក​ឃើញ​អ្នក​ឆ្លង​កូ​វី​ដ​១៩ ចំនួន​៥៣៣​នាក់ ក្នុង​នោះ​អ្នកជា​សះស្បើយ​ចំនួន​៤៧៣​នាក់ និង​អ្នក​កំពុង​សម្រាក​ព្យាបាល​នៅ​មន្ទីរពេទ្យ​ចំនួន ៦០​នាក់​ផង​ដែរ ៕