រាជធានីភ្នំពេញ ៖ ក្រសួងសុខាភិបាលបានអះអាងថា បានព្យាបាលអ្នកឆ្លងជំងឺកូវីដ១៩ ជាសះស្បើយចំនួន៣នាក់ ខណៈគ្មានអ្នកឆ្លងថ្មីនោះទេ ។
ក្រសួងសុខាភិបាលបានឲ្យដឹង នៅថ្ងៃទី១៣ កុម្ភៈ ឆ្នាំ២០២១ថាមានករណីជាសះស្បើយ សរុបចំនួន៣នាក់ ដែលជាអ្នកដំណើរចូលមកកម្ពុជា (មិនមែនជាពលករធ្វើ ដំណើរមកពីប្រទេសថៃ) ។
អ្នកដែលព្យាបាលជាសះស្បើយមាន ៖
១- បុរសជនជាតិឥណ្ឌូនេស៊ី អាយុ ២៩ឆ្នាំ មានអាសយដ្ឋានស្នាក់នៅសណ្ឋាគារមួយ ក្នុងរាជធានីភ្នំពេញ ជាអ្នកធ្វើដំណើរមកពីប្រទេសហ្វីលីពីន បន្តជើងហោះហើរនៅប្រទេសកូរ៉េខាងត្បូង មកដល់កម្ពុជានៅថ្ងៃទី ២៩ ខែមករា ឆ្នាំ២០២១។
២- បុរសជនជាតិឥណ្ឌូនេស៊ី អាយុ ៣១ឆ្នាំ មានអាសយដ្ឋានស្នាក់នៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ ជាអ្នកធ្វើដំណើរមកពីប្រទេសឥណ្ឌូនេស៊ី បន្តជើងហោះហើរនៅប្រទេសសិង្ហបុរី មកដល់កម្ពុជា នៅថ្ងៃទី២៣ ខែមករា ឆ្នាំ២០២១ ។
សូមកត់សម្គាល់ថា៖ បុគ្គលទាំង ២នាក់ ខាងលើនេះ ត្រូវបានព្យាបាលជាសះស្បើយដោយទទួល បានលទ្ធផលតេស្ត អវិជ្ជមានវីរុសកូវីដ-១៩ ចំនួន ០២លើក ត្រូវបានអនុញ្ញាតឲ្យចេញពីមជ្ឈមណ្ឌលជាតិ កំចាត់រោគរបេង និងហង់សិន រាជធានីភ្នំពេញ។
៣- បុរសជនជាតិនីហ្សេរីយ៉ា អាយុ ៣១ឆ្នាំ មានអាសយដ្ឋានស្នាក់នៅសណ្ឋាគារមួយ ក្នុងរាជធានីភ្នំពេញ ជាអ្នកធ្វើដំណើរមកពីប្រទេសនីហ្សេរីយ៉ា បន្តជើងហោះហើរនៅប្រទេសកូរ៉េខាងត្បូង មកដល់កម្ពុជានៅថ្ងៃទី ២០ ខែមករា ឆ្នាំ២០២១ ។ បុរសរូបនេះត្រូវបានព្យាបាល ជាសះស្បើយ ដោយទទួលបានលទ្ធផលតេស្តអវិជ្ជមាន វីរុសកូវីដ-១៩ ចំនួន ២លើក ត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ -សូវៀត រាជធានីភ្នំពេញ ។
សូមជម្រាបថា បន្ទាប់ដំណើរចាក់វ៉ាក់សាំងការពារជំងឺកូវីដ១៩ស៊ីណូហ្វាម(Sinopharm)ដែលប្រទេសចិនបានផ្តល់ជំនួយ១លានដូសហើយបានមកដល់កម្ពុជាកាលពីកន្លងមកនេះចំនួន៦០ម៉ឺនដូសនោះ សម្ដេចតេជោ ហ៊ុន សែន អនុញ្ញាតឱ្យប្រើប្រាស់វ៉ាក់សាំង Sinovac របស់ចិន និង AstraZeneca របស់អង់គ្លេស ក្នុងលក្ខខណ្ឌប្រើប្រាស់បន្ទាន់ ។
ក្រសួងសុខាភិ បាលរបស់កម្ពុជា នៅថ្ងៃទី១២ ខែកុម្ភៈ ឆ្នាំ២០២១នេះ បានប្រកាសឱ្យដឹងថា ដោយមានការឯកភាពពីសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្រសួងសម្រេចអនុញ្ញាតឲ្យប្រើប្រាស់វ៉ាក់សាំងការពារកូវីដ-១៩ Sinovac របស់ចិន និង វ៉ាក់សាំង AstraZeneca របស់អង់គ្លេស ក្នុងលក្ខខណ្ឌប្រើប្រាស់បន្ទាន់ ។ វ៉ាក់សាំងទាំងពីរ ត្រូវបានប្រើប្រាស់ប្រកបដោយសុវត្ថិភាព នៅប្រទេសចិន អង់គ្លេសនិងបណ្ដាប្រទេសផ្សេងៗទៀត ៕