Join with Health.com.kh on Telegram

រាជធានី​ភ្នំពេញ ៖ ក្រសួងសុខាភិបាល​បាន​ប្រកាស​នៅ​ព្រឹក ថ្ងៃ​ទី​១៩ ខែមករា ឆ្នាំ​២០២១​នេះ បាន​រក​ឃើញ​អ្នក​ឆ្លង​ជំងឺ​កូ​វី​ដ​១៩ ថ្មី​ចំនួន​២​នាក់​ទៀត ខណៈ​អ្នកជា​សះស្បើយ​មិន​មាន​ឡើយ ។

ក្រសួង​បាន​បន្ត​ថា អ្នក​ឆ្លង​កូ​វី​ដ​១៩ ថ្មី​ទាំង​២​នាក់​នោះ​រួម​មាន​៖
១- កុមា​រា​ជនជាតិ​ឥណ្ឌូ​ណេ​ស៊ី អាយុ​១​ឆ្នាំ ស្នាក់​នៅ​ខេត្តសៀមរាប ជា​កូនប្រុស​របស់​បុរស​អាយុ​៣៤​ឆ្នាំ និង​ស្ត្រី​អាយុ​៣៣​ឆ្នាំ ដែល​វិជ្ជមាន​កូ​វី​ដ​១៩ កាលពី​ថ្ងៃ​ទី​១៣ ខែមករា ឆ្នាំ​២០២១ ជា​អ្នកដំណើរ​មក​ពី​ប្រទេស​ឥណ្ឌូ​ណេ​ស៊ី បន្ត​ជើងហោះហើរ​នៅ​ប្រទេស​សិង្ហ​បុរី មក​ដល់​កម្ពុជា នៅ​ថ្ងៃ​ទី​១២ ខែមករា ឆ្នាំ​២០២១ ។ បច្ចុប្បន្ន​អ្នកជំងឺ​ត្រូវ​បាន​ដាក់​ឲ្យ​សម្រាក​ព្យាបាល នៅ​មជ្ឈមណ្ឌល​ជាតិ​កម្ចាត់​មេ​រោក​របេង និង​ហង់​សិន រាជធានី​ភ្នំពេញ​។

២- ស្ត្រីជន​ជាតិខ្មែរ អាយុ​៣១​ឆ្នាំ ស្នាក់​នៅ​ភូមិ​គោរ​ដ្ឋា​ន សង្កាត់​អូរ​អំបិល ក្រុង​សិរី​សោ​ភ័​ណ្ឌ ខេត្តបន្ទាយមានជ័យ បាន​ធ្វើ​ដំណើរ​មក​ពី​ប្រទេស​ថៃ មក​ដល់​កម្ពុជា​នៅ​ថ្ងៃ​ទី​១៥ ខែមករា ឆ្នាំ​២០២១ ។ បច្ចុប្បន្ន​អ្នកជំងឺ​ត្រូវ​បាន​ដាក់​ឲ្យ​ព្យាបាល នៅ​មន្ទីរពេទ្យ​បង្អែក ខេត្តបន្ទាយមានជ័យ​។

គិត​ត្រឹម​ម៉ោង​៧​និង​០០​នាទី​ព្រឹក​ថ្ងៃ​ទី​១៩ ខែមករា ឆ្នាំ​២០២១​នេះ កម្ពុជា​បាន​រក​ឃើញ​អ្នក​ឆ្លង​កូ​វី​ដ​១៩ សរុប​ចំនួន ៤៤១​នាក់ ក្នុង​នោះ​អ្នកជា​សះស្បើយ ៣៨៦​នាក់ និង​អ្នកជំងឺ​កំពុង​សម្រាក​ព្យាបាល​នៅ​មន្ទីរពេទ្យ ៥៥​នាក់​ផង​ដែរ ៕