រាជធានី​ភ្នំពេញ ៖ នៅ​ព្រឹក ថ្ងៃ​ទី​០២ ខែមករា ឆ្នាំ​២០២១​នេះ​ក្រសួងសុខាភិបាល​បាន​ប្រកាស​ថា បាន​រក​ឃើញ​ករណី​វិជ្ជមាន​វីរុស​កូ​វី​ដ​១៩ ថ្មី​ម្នាក់​ទៀត ដែល​ជា​អ្នក​ធ្វើ​ដំណើរ​មក​ពី​អា​មេ​រិ​ក និង​គ្មាន​ករណី​ជា​សះស្បើយ​ឡើយ ។

អ្នក​ឆ្លង​ជំងឺ​កូ​វី​ដ​១៩ ម្នាក់​ខាងលើ​នេះ គឺជា​ស្ត្រីជន​ជាតិខ្មែរ​-​អា​មេ​រិ​កាំ​ង អាយុ​៣៦​ឆ្នាំ ស្នាក់​នៅ​ក្រុង​តា​ខ្មៅ ខេត្តកណ្តាល បាន​ធ្វើ​ដំណើរ​មក​ពី​អា​មេ​រិ​ក​បន្ត​ជើងហោះហើរ​នៅ​ប្រទេស​ចិន (​តៃវ៉ាន់​) មក​ដល់​កម្ពុជា នៅ​ថ្ងៃ​ទី​០១ ខែមករា ឆ្នាំ ២០២១ ។ លទ្ធផល​ធ្វើតេស្ត​វត្ថុ​សំណាក​របស់​ស្ត្រី​ខាងលើ​ដែល​ផ្តល់​ដោយ​វិទ្យាស្ថាន​ប៉ាស្ទ័រ​កម្ពុជា គឺ​វិជ្ជមាន​កូ​វី​ដ​១៩ ហើយ​បច្ចុប្បន្ន​អ្នកជំងឺ​កំពុង​សម្រាក​ព្យាបាល នៅ​មជ្ឈមណ្ឌល​ជាតិ​កម្ចាត់​មេរោគ​របេង និង​ហង់​សិន ។

គត់​សម្គាល់ថា អ្នកដំណើរ​តាម​ជើងហោះហើរ​ខាងលើ សរុប​មាន​ចំនួន​១០​នាក់ ដែល​ក្នុង​ចំនួន​នោះ មាន​បុគ្គល​ខាងលើ​ផង​ដែរ​។ រីឯ​អ្នកដំណើរ​ចំនួន​០៩​នាក់ ដែល​មាន​លទ្ធផល​តេស្ត​អវិជ្ជមាន​វីរុស​កូ​វី​ដ​១៩ ត្រូវ​បាន​ដាក់​ឲ្យ​ធ្វើ​ច​ត្តា​ឡី​ស័ក​ចំនួន ១៤​ថ្ងៃ នៅ​សណ្ឋាគារ​មួយ ក្នុង​រាជធានី​ភ្នំពេញ ។

សូម​បញ្ជាក់ ៖ គិត​ត្រឹម​ម៉ោង​៧​និង​០០​នាទី​ព្រឹក ថ្ងៃ​ទី​០២ ខែមករា ឆ្នាំ​២០២១​នេះ កម្ពុជា​បាន​រក​ឃើញ​អ្នក​ឆ្លង​កូ​វី​ដ​១៩ ចំនួន​៣៧៩​នាក់ ក្នុង​នោះ​អ្នកជា​សះស្បើយ​ចំនួន ៣៦២​នាក់ និង​អ្នកជំងឺ​កំពុង​សម្រាក​នៅ​មន្ទីរពេទ្យ​ចំនួន ១៧​នាក់ ៕