រាជធានីភ្នំពេញ ៖ ក្រសួងសុខាភិបាលបានប្រកាស នៅព្រឹកថ្ងៃទី២៦ ខែធ្នូ ឆ្នាំ២០២០នេះបានព្យាបាលជាសះស្បើយអ្នកកើតកូវីដ១៩ ថ្មី០១នាក់ ហើយអនុញ្ញាតឲ្យចេញពីមន្ទីរពេទ្យផងដែរ និងមិនមានរកឃើញករណីឆ្លងកូវីដ១៩ ថ្មីឡើយ ។
ក្រសួងបានបញ្ជាក់ថា ចំពោះអ្នកជាសះស្បើយនេះ ជាស្ត្រីជនជាតិខ្មែរ អាយុ៤៥ឆ្នាំ ស្នាក់នៅសង្កាត់និរោធ ខណ្ឌច្បារអំពៅ រាជធានីភ្នំពេញ ជាម្តាយមីរបស់បុរស អាយុ៣៦ឆ្នាំ ដែលបានជាសះស្បើយ កាលពីថ្ងៃទី១៥ ខែធ្នូ ឆ្នាំ២០២០ ។ ស្ត្រីខាងលើនេះ ត្រូវបានព្យាបាលជាសះស្បើយ ដោយទទួលបានលទ្ធផលតេស្ត អវិជ្ជមានវីរុសកូវីដ១៩ ចំនួន០២លើក ត្រូវបានអនុញ្ញាតឲ្យចេញពីមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ។
សូមបញ្ជាក់ ៖ គិតត្រឹមម៉ោង៧និង០០នាទី ព្រឹកថ្ងៃទី២៦ ខែធ្នូ ឆ្នាំ២០២០នេះ នៅកម្ពុជាបានរកឃើញអ្នកឆ្លងកូវីដ១៩ ចំនួន ៣៦៣នាក់ ក្នុងនោះអ្នកព្យាបាលជាសះស្បើយចំនួន ៣៥៥នាក់ និងអ្នកកំពុងសម្រាកព្យាបាលនៅមន្ទីរពេទ្យចំនួន ៨នាក់។ សម្រាប់អ្នកឆ្លងក្នុងព្រឹត្តិការណ៍ «សហគមន៍២៨វិច្ឆិកា» មានចំនួន ៤១នាក់ ក្នុងអ្នកព្យាបាលជាសះស្បើយចំនួន ៣៧នាក់ និងអ្នកកំពុងសម្រាកព្យាបាលនៅមន្ទីរពេទ្យមានចំនួន ៤នាក់ទៀត ៕