រាជធានី​ភ្នំពេញ ៖ ក្រសួងសុខាភិបាល​បាន​ប្រកាស​នៅ​ព្រឹក ថ្ងៃ​ទី​២២ ខែធ្នូ ឆ្នាំ​២០២០​នេះ បាន​ព្យាបាល​ជា​សះស្បើយ​អ្នកជំងឺ​កូ​វី​ដ​១៩ ចំនួន​២​នាក់​ទៀត​ផង ខណៈ​គ្មាន​អ្នក​ឆ្លង​ថ្មី​ឡើយ ។

ក្រសួង​បន្ត​ថា អ្នកជា​សះស្បើយ​ពី​ជំងឺ​កូ​វី​ដ​១៩ ទាំង​២​នាក់​ខាងលើ​នេះ​រួម​មាន
១- ស្ត្រីជន​ជាតិខ្មែរ អាយុ​៣២​ឆ្នាំ ស្នាក់​នៅ​បុរី លឹ​ម ឈាង​ហាក់ សង្កាត់​វាល​ស្បូវ ខណ្ឌ​ច្បារ​អំពៅ រាជធានី​ភ្នំពេញ ត្រូវ​បាន​ព្យាបាល​ជា​សះស្បើយ ដោយ​ទទួល​បាន​លទ្ធផល​អវិជ្ជមាន​វីរុស​កូ​វី​ដ​១៩ ចំនួន​២​លើក ត្រូវ​បាន​អនុ​ញ្ញា​ឲ្យ​ចេញពី​មន្ទីរពេទ្យ​មិត្តភាព​ខ្មែរ​-​សូ​វៀត ។

២- បុរស​ជនជាតិ​ខ្មែរ អាយុ​៧៥​ឆ្នាំ ស្នាក់​នៅ​សង្កាត់​ផ្សារ​ថ្មី ខណ្ឌដូនពេញ រាជធានី​ភ្នំពេញ ជា​អ្នកដំណើរ​មក​ពី​ប្រទេស​ចិន តាម​ជើងហោះហើរ មក​ដល់​កម្ពុជា នៅ​ថ្ងៃ​ទី​២០ ខែវិច្ឆិកា ឆ្នាំ​២០២០ ត្រូវ​បាន​ព្យាបាល​ជា​សះស្បើយ ដោយ​ទទួល​បាន​លទ្ធផល អវិជ្ជមាន​វីរុស​កូ​វី​ដ​១៩ ចំនួន​២​លើក ត្រូវ​បាន​អនុ​ញ្ញា​ឲ្យ​ចេញពី​មន្ទីរពេទ្យ​មិត្តភាព​ខ្មែរ​-​សូ​វៀត ។

សម្រាប់​អ្នក​ឆ្លង​កូ​វី​ដ​១៩ ដែល​ពាក់ព័ន្ធ​ព្រឹត្តិការណ៍ «​សហគមន៍ ២៨​វិច្ឆិកា​» វិញ បាន​រក​ឃើញ​សរុប​ចំនួន​៤១​នាក់ ក្នុង​នោះ​ព្យាបាល​ជា​សះស្បើយ​ចំនួន ៣១​នាក់ និង​១០​នាក់ កំពុង​សម្រាក​ព្យាបាល​នៅ​មន្ទីរពេទ្យ ។

សូម​ជម្រាប​ថា គិត​ត្រឹម​ម៉ោង​៧៖០០​នាទី​ព្រឹក​ថ្ងៃ​ទី​២២ ខែធ្នូ ឆ្នាំ​២០២០​នេះ កម្ពុជា​បាន​រក​ឃើ​អ្នក​ឆ្លង​កូ​វី​ដ​១៩ ចំនួន​៣៦៣​នាក់ ក្នុង​នោះ​អ្នកជំងឺ​៣៤៧​នាក់ បានជា​សះស្បើយ និង​អ្នកជំងឺ​ចំនួន ១៦​នាក់ កំពុង​សម្រាក​ព្យាបាល​នៅ​មន្ទីរពេទ្យ ៕