រាជធានីភ្នំពេញ ៖ ក្រសួងសុខាភិបាលបានប្រកាសថា បានរកឃើញស្ត្រីអ្នកឆ្លងជំងឺកូវីដ១៩ ថ្មី០១នាក់ទៀត ដែលមកពីក្រៅប្រទេស ខណៈគ្មានអ្នកជាសះស្បើយឡើយ ។
ក្រសួងសុខាភិបាលបានបន្តថា នៅថ្ងៃទី២១ ធ្នូ ឆ្នាំ២០២០ថា អ្នកឆ្លងកូវីដ១៩ថ្មី ជាអ្នកដំណើរចូលមកកម្ពុជា ជាស្ត្រីជនជាតិខ្មែរអាមេរិកកាំង អាយុ៥៥ឆ្នាំ មានអាសយដ្ឋានស្នាក់នៅសណ្ឋាគារមួយក្នុងរាជធានីភ្នំពេញ បានធ្វើដំណើរមកពីសហរដ្ឋអាមេរិក បន្តជើងហោះហើរនៅប្រទេសចិន (តៃវ៉ាន់) មកដល់កម្ពុជានៅថ្ងៃទី២០ ខែធ្នូ ឆ្នាំ ២០២០ ដែលលទ្ធផលធ្វើតេស្តវត្ថុសំណាករបស់ស្ត្រីខាងលើផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ គឺវិជ្ជមានវីរុសកូវីដ-១៩ ហើយបច្ចុប្បន្នអ្នកជំងឺត្រូវបានដាក់ឲ្យសម្រាកព្យាបាលនៅមជ្ឈមណ្ឌលជាតិប្រយុទ្ធនឹងជំងឺរបេង និងហង់សិន រាជធានីភ្នំពេញ ។
ជាមួយគ្នានោះដែរ ក្រសួងក៏បានលើកឡើងថា ចំពោះលទ្ធផលធ្វើតេស្តអ្នកប៉ះពាល់ក្នុងព្រឹត្តិការណ៍សហគមន៍ ២៨ វិច្ឆិកា ។ វត្ថុសំណាកនៅសល់ពីថ្ងៃទី១៩ ខែធ្នូ ២០២០ ចំនួន ៧៥សំណាក សរុបមានចំនួនទាំងអស់ ៩៨សំណាក ដែលនៅក្នុងចំនួននេះ មានចំនួន ៧៥សំណាកត្រូវបានធ្វើវិភាគដោយវិទ្យាស្ថានប៉ាស្ទ័រកម្ពុជានៅថ្ងៃទី២០ ខែធ្នូ ឆ្នាំ២០២០ គឺមានលទ្ធផលអវិជ្ជមានវីរុសកូវីដ-១៩ ទាំងអស់ ។ ដោយឡែកនៅសល់វត្ថុសំណាកចំនួន២៣សំណាកទៀតត្រូវធ្វើវិភាគបន្តនៅថ្ងៃទី២១ ខែធ្នូ ឆ្នាំ២០២០ (ដោយសារវត្ថុសំណាកទាំងនេះ ទទួលបានក្រោយម៉ោង១៧:០០នាទីល្ងាចនៃថ្ងៃដដែល)។
សរុបអ្នកជំងឺកូវីដ-១៩ ដែលបានរកឃើញពាក់ព័ន្ធ «ព្រឹត្តិការណ៍សហគមន៍ ២៨ វិច្ឆិកា ពីថ្ងៃទី២៨ ខែវិច្ឆិកា ឆ្នាំ២០២០ ដល់ថ្ងៃទី២០ ខែធ្នូ ឆ្នាំ២០២០ មានចំនួន៤១នាក់ (ស្រី ១៩នាក់ និងប្រុស ២២នាក់) ដែលនៅក្នុងចំនួននេះ មានអ្នកជាសះស្បើយ សរុបចំនួន៣០នាក់ (ស្រី ១២នាក់ និងប្រុស ១៨នាក់) ។
ក្រសួងលើកឡើងថា អ្នកឆ្លងជំងឺកូវីដ១៩ កំពុងសម្រាកព្យាបាលនៅមន្ទីពេទ្យមានចំនួន១៨នាក់ អ្នកព្យាបាលជាសះស្បើយចំនួន៣៤៥នាក់ ក្នុងចំណោមអ្នកឆ្លងសរុបទូទាំងប្រទេសមានចំនួន៣៦៣នាក់ផងដែរ ៕