ការស្រាវជ្រាវថ្មីមួយបានបង្ហាញថា ការធ្វើលំហាត់ប្រាណជាទៀងទាត់ និងការព្យាបាលដោយចលនាអាចផ្តល់ប្រយោជន៍ដល់អ្នកដែលមានជំងឺលាកសន្លាក់ត្រគាក និងជង្គង់បាន។
ការស្រាវជ្រាវបានមើលទៅលើមនុស្ស២០៦នាក់ដែលមានជំងឺរលាកសន្លាក់ត្រគាក និងជង្គង់ (អាយុជាមធ្យម៦៦ឆ្នាំ)ហើយត្រូវបានចែកជាពីរក្រុម។ មួយក្រុមបានទទួលការថែទាំធម្មតា ខណៈដែលក្រុមដទៃទៀតមានការធ្វើលំហាត់ប្រាណជាទៀងទាត់ការព្យាបាលដោយចលនា ឬធ្វើទាំងពីរដែលត្រូវបានបន្ថែមទៅនឹងការថែទាំស្តង់ដារទៀត។
អ្នកស្រាវជ្រាវបាននិយាយថា ក្រោយពី២ឆ្នាំអ្នកដែលបានធ្វើលំហាត់ប្រាណ និងធ្វើការព្យាបាលដោយចលនា មានភាពប្រសើរឡើង ចំពោះការឈឺចាប់ការគាំងសន្លាក់ និងមុខងាររាងកាយជាងអ្នកដែលបានទទួលការព្យាបាលធម្មតាតែមួយមុខ។
វេជ្ជបណ្ឌិត ហាប៊ី អាប៊ូត (J. Haxby Abbott) ដែលមកពីសាកលវិទ្យាល័យ Otagoបាននិយាយថា លទ្ធផលនេះបានបង្ហាញថា ការបន្ថែមការធ្វើលំហាត់ប្រាណ ឬការព្យាបាលដោយចលនា ឬការបន្ថែមការធ្វើលំហាត់ប្រាណ និងការព្យាបាលដោយចលនា ទៅលើការថែទាំធម្មតានោះ រឹតតែមានប្រយោជន៍ចំពោះអ្នកដែលមានជំងឺរលាកសន្លាក់ជង្គង់ និងត្រគាក។
ជំងឺរលាកសន្លាក់ឆ្អឹង គឺជាប្រភេទទូទៅបំផុតនៃជំងឺសន្លាក់ក្នុងចំណោមមនុស្សវ័យកណ្តាល និងមនុស្សចាស់ ដែលបបណ្តាលអោយមានការខូចខាតបន្តិចម្តងៗនូវឆ្អឹងខ្ចីនៃសន្លាក់។ វាអាចបណ្តាលអោយឈឺហើម និងការធ្វើចលនារបស់សន្លាក់៕
