នៅប្រទេសកម្ពុជាយើង ការកើតជំងឺខ្លាញ់រុំថ្លើមមិនសូវល្បីដូចជំងឺខ្លាញ់រុំបេះដូងទេ ប៉ុន្តែជំងឺនេះកំពុងតែកើនឡើងយ៉ាងខ្លាំងនៅទូទាំងពិភពលោក។ វាគឺជាជំងឺមួយដែលជាប់ទាក់ទងនឹងជំងឺទឹកនោមផ្អែមប្រភេទទី២ ជំងឺធាត់ជ្រុល និងការស៊ាំរបស់អាំងស៊ុយលីន។ បើសិនជាជំងឺនេះមិនត្រូវបានរកឃើញក្នុងដំណាក់កាលដំបូងទេ វាប្រហែលជាអាចក្លាយទៅជាជំងឺថ្លើមធ្ងន់ធ្ងរ និងបញ្ហាសុខភាពផ្សេងៗទៀតបាន។
ជំងឺខ្លាញ់រុំថ្លើមបង្កឡើងដោយសារតែការកកកុញខ្លាញ់ច្រើនក្នុងកោសិកាថ្លើម។ ថ្លើមត្រូវបានគេចាត់ទុកថាជាខ្លាញ់សុទ្ធបើសិនជាកោសិការបស់វាមានជាតិខ្លាញ់ច្រើនជាង ៥ភាគរយ។ មូលហេតុដ៏ចំបងរបស់ជំងឺនេះគឺការញ៉ាំគ្រឿងស្រវឹងច្រើនៗ ប៉ុន្តែវាក៏បណ្តាលមកពីមូលហេតុផ្សេងៗទៀតដែរ។ ករណីមួយទៀតគឺថា វាជាជំងឺខ្លាញ់រុំថ្លើមដោយសារមិនមែនគ្រឿងស្រវឹង (Non-alcoholic Fatty Liver Disease, NAFLD) ដែលវាច្រើនតែកើតឡើងជាញឹកញាប់លើមនុស្សធំទាំងពីរភេទ និងក្មេងៗនៅប្រទេសលោកខាងលិច។
ស្ថិតក្នុងករណីជំងឺខ្លាញ់រុំថ្លើមប្រភេទ NAFLD គឺជាដំណាក់កាលដំបូង ដែលវាអាចវិវត្តន៍ទៅជាធម្មតាវិញបានបើសិនជាព្យាបាលទាន់ពេលវេលា។ ប៉ុន្តែបើសិនជាមិនរកឃើញទាន់ពេលវេលាទេ វាអាចវិវត្តន៍ទៅជាអាការៈមួយធ្ងន់ធ្ងរបានឈ្មោះថា Non-alcoholic Steatohepatitis (NASH) ដែលជាស្ថានភាពជំងឺមួយប្រភេទមានការប្រមូលផ្តុំខ្លាញ់យ៉ាងច្រើន និងការរលាកលើថ្លើម ដែលជាហេតុនាំឲ្យកោសិកាថ្លើមមានការខូចខាតយ៉ាងធ្ងន់ធ្ងរ។ ការខូចខាតនេះនឹងធ្វើឲ្យកើតជាសម្លាកដល់ជាលិកាថ្លើម និងចុងក្រោយអាចប្រឈមនឹងជំងឺក្រិនថ្លើម ឬមហារីកថ្លើមខ្ពស់។
ចំពោះរោគសញ្ញាជំងឺខ្លាញ់រុំថ្លើមវិញមានដូចជា៖
- អស់កម្លាំង
- កម្រិតអាំងស៊ុយលីន ខ្លាញ់ Triglycerides និងអង់ស៊ីមថ្លើមកើនឡើង
- ឈឺចាប់តិចតួចនៅកណ្តាលពោះ ឬផ្នែកខាងស្តាំនៃពោះ
នៅពេលជំងឺខ្លាញ់រុំថ្លើមវិវត្តន៍ទៅជា NASH រោគសញ្ញារបស់វាអាចមានដូចជា ក្អួតចង្អោ ឈឺពោះមធ្យមឬខ្លាំងក្លា ភ្នែកនិងស្បែកទៅជាលឿង និងមិនឃ្លានអាហារ៕