ស្រ្ដីភាគច្រើន កើតមានជំងឺបម្រុងក្រឡាភ្លើង នៅជិតដល់កាលកំណត់សម្រាលកូនរបស់ពួកគេ ដូច្នេះ វាទាមទារការព្យាបាល និងមើលថែទាំដោយត្រឹមត្រូវជាទីបំផុត។ ប៉ុន្តែ បើសិនបើអ្នកកើតមានបញ្ហាលឿន ហើយកាន់តែធ្ងន់ធ្ងរទៅៗ វាកាន់តែគ្រោះថ្នាក់ដល់អ្នក និងទារកអ្នកដោយសារតែជំងឺបម្រុងក្រឡាភ្លើងតែងតែបង្កើនឱកាសនៃការកើតមានផលវិបាកធ្ងន់ធ្ងរជាច្រើន។

ជំងឺបម្រុងក្រឡាភ្លើង អាចប៉ះពាល់ដល់សរីរាង្គជាច្រើន និងបណ្តាលឲ្យមានបញ្ហាសុខភាពធ្ងន់ធ្ងរ ឬគំរាមកំហែងដល់អាយុជីវិត។ នោះហើយជាមូលហេតុដែលស្ត្រីមួយចំនួន អាចត្រូវបង្ខំចិត្តសម្រាលកូនឲ្យបានលឿនង និងទាន់ពេល ប្រសិនបើស្ថានភាពជំងឺនេះកាន់តែធ្ងន់ធ្ងរ ឬកាន់តែអាក្រក់ទៅៗ។

ជំងឺបម្រុងក្រឡាភ្លើង បង្កឲ្យសរសៃឈាមស្ទះ ធ្វើឲ្យសម្ពាធឈាមកើនឡើងខ្ពស់ និងកាត់បន្ថយលំហូរឈាម ដែលអាចប៉ះពាល់ដល់សរីរាង្គក្នុងខ្លួន រួមទាំងថ្លើម តម្រងនោម និងខួរក្បាល។

ការផ្លាស់ប្តូរទាំងនេះ អាចបណ្តាលឲ្យសរសៃឈាមតូចៗហើម។ ហើយនៅពេលសរសៃឈាមតូចៗទាំងនេះនៅក្នុងតម្រងនោមធ្លាយ ប្រូតេអ៊ីនពីចរន្តឈាមនឹងហៀរចូលក្នុងទឹកនោម។

នៅពេលដែលមានឈាមតិចតួចទៅក្នុងស្បូន វាអាចបណ្តាលឲ្យមានបញ្ហាដល់ទារក ដូចជាការលូតលាស់ខ្សោយ ទឹកភ្លោះតិច និងការរំខានដល់ការសម្រាលកូន។

លើសពីនេះទៀត ទារកអាចនឹងទទួលរងផលប៉ះពាល់នៃការកើតមិនគ្រប់ខែ ប្រសិនបើការសម្រាលកូនឆាប់រហ័ស ជាតម្រូវការចាំបាច់ ដើម្បីការពារសុខភាពមាតា និងការពារការស្លាប់កូន៕