ប្រទេសសិង្ហបុរីបានបញ្ជាក់ពីករណីដំបូងនៃការឆ្លងវីរុសកូរ៉ូណា ដែលបង្កឱ្យទីក្រុងវូហានរបស់ប្រទេសចិនស្ថិតនៅកម្រិតប្រកាសអាសន្ន។

សារព័ត៌មានវៀតណាមក៏បានចុះផ្សាយអមដោយការបញ្ជាក់ពីមន្រ្តីនៅប្រទេសវៀតណាមថា ជនជាតិចិនពីរនាក់កំពុងសម្រាកព្យាបាលនៅមន្ទីរពេទ្យជោរៃវៀតណាម។

យោងតាមរបាយការណ៍ផ្លូវការបានឱ្យដឹងថា ការផ្ទុះឡើងនៃជំងឺនេះបានធ្វើឱ្យមនុស្សឈឺជាង ៥០០ នាក់នៅប្រទេសចិន និងអ្នកជំងឺ ១៧ នាក់បានស្លាប់ដោយសារជំងឺនេះ។

ជំងឺនេះអាចបណ្តាលឱ្យមានជំងឺរលាកសួត និងបញ្ហាផ្លូវដង្ហើមផ្សេងទៀត ហើយត្រូវបានគេប្រៀបធៀបទៅនឹង SARS និង MERS ដែលជាជំងឺឆ្លងពីរផ្សេងទៀត។

អង្គការសុខភាពពិភពលោកគ្រោងនឹងជួបគ្នាម្តងទៀតនៅថ្ងៃព្រហស្បតិ៍បន្ទាប់ពីបញ្ចប់កិច្ចប្រជុំនៅថ្ងៃពុធដោយមិនបានសំរេចថាតើត្រូវប្រកាសពីជំងឺនេះជាភាពអាសន្នសុខភាពសកលឬទេ៕