ការស្រាវជ្រាវថ្មីមួយបានបង្ហាញថា ការបំពុលបរិយាកាស (ខ្យល់ពុល) អាចបង្កឲ្យមានការផ្លាស់ប្តូរខួរក្បាលដូចជំងឺចាស់វង្វេង (alzheimer) និងការថយចុះល្បឿននៃការចងចាំចំពោះមនុស្សវ័យចំណាស់។

(អាន:ថ្នាំងងុយគេង ពេលអ្នកគួរប្រើ)

ការស្រាវជ្រាវពីមុនបានបង្ហាញថាការប៉ះពាល់នឹងការបំពុលបរិយាកាសបង្កើនហានិភ័យនៃជំងឺភ្លេចភ្លាំង និងជំងឺវង្វេងប្រភេទដទៃទៀត ប៉ុន្តែវាមិនច្បាស់ទេថាតើការបំពុលប្រភេទនេះប៉ះពាល់ដល់ខួរក្បាល និងការចងចាំយ៉ាងដូចម្តេច។

(អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?

អ្នកស្រាវជ្រាវ Andrew Petkus បាននិយាយថា នេះគឺជាការសិក្សាដំបូងបង្អស់ដែលបង្ហាញតាមគម្រូស្ថិតិថា ការបំពុលខ្យល់ត្រូវបានផ្សារភ្ជាប់ជាមួយនឹងការផ្លាស់ប្តូរខួរក្បាលរបស់មនុស្ស ហើយបន្ទាប់មក ការផ្លាស់ប្តូរទាំងនោះត្រូវបានផ្សារភ្ជាប់ជាមួយនឹងការថយចុះនៃការចងចាំ។ គាត់ជាជំនួយការសាស្រ្តាចារ្យផ្នែកសរសៃប្រសាទផ្នែកវេជ្ជសាស្ត្រនៅឯសាកលវិទ្យាល័យវេជ្ជសាស្ត្រកាលីហ្វ័រញ៉ាភាគខាងត្បូង (University of Southern California)។

Andrew Petkus ពន្យល់ថា “ក្តីសង្ឃឹមរបស់យើងគឺថា តាមរយៈការយល់ដឹងកាន់តែច្បាស់ពីការផ្លាស់ប្តូរខួរក្បាលដែលបណ្តាលមកពីការបំពុលបរិយាកាស អ្នកស្រាវជ្រាវនឹងអាចបង្កើតការធ្វើអន្តរាគមន៍ ដើម្បីជួយមនុស្សដែលមានហានិភ័យខ្ពស់ ចំពោះការថយចុះការយល់ដឹង” ។

ការស្រាវជ្រាវបានរាប់បញ្ចូលស្ត្រីជិត ១.០០០ នាក់ដែលមានអាយុ ៧៣ ទៅ ៨៧ ឆ្នាំដែលបានស្កេនខួរក្បាលរយៈពេល ៥ ឆ្នាំ។ ក្រុមអ្នកស្រាវជ្រាវក៏បានវាយតម្លៃព័ត៌មានអំពីកន្លែងដែលស្ត្រីរស់នៅ និងទិន្នន័យបរិស្ថានពីទីតាំងទាំងនោះ ដើម្បីប៉ាន់ស្មានពីការប៉ះពាល់របស់ស្ត្រីទៅនឹងការបំពុល។

លទ្ធផលបានបង្ហាញថា ស្ត្រីដែលត្រូវបានប៉ះពាល់នឹងកម្រិតខ្ពស់នៃការបំពុលបរិយាកាស មានការផ្លាស់ប្តូរដូចជាជំងឺវង្វេងវង្វាន់នៅក្នុងរចនាសម្ព័ន្ធខួរក្បាល និងការថយចុះការចងចាំកាន់តែខ្លាំងជាងស្ត្រីដែលមិនសូវមានការប៉ះពាល់នឹងការបំពុលបរិយាកាស។ ប៉ុន្តែការសិក្សាបានបង្ហាញតែការផ្សារភ្ជាប់គ្នា ហើយមិនអាចបង្ហាញថាការបំពុលបរិយាកាសបណ្តាលឲ្យមានការផ្លាស់ប្តូរខួរក្បាល ឬការថយចុះការចងចាំនោះទេ។

ជំងឺវង្វេងវង្វាន់ គឺជាបុព្វហេតុឈានមុខគេទី ៦ នៃការស្លាប់នៅសហរដ្ឋអាមេរិក។ មិនមានការព្យាបាលនោះទេ។

ការស្រាវជ្រាវត្រូវបានចេញផ្សាយនៅក្នុងទិនានុប្បវត្តិ Brain៕