​​បុរស​ជនជាតិ​រុស្ស៊ី​ម្នាក់​បាន​លែងលះ​ភរិយា​រៀបការ ១៤ ឆ្នាំ​របស់គាត់ បន្ទាប់ពី​នាង​បាន​រិះគន់​ទម្រង់​លេង​របស់​លី​អូ​នែ​ល ម៉េ​ស​ស៊ី អំឡុង​វើ​ល​ខាប់​។​

​លោក អា​សេន អាយុ ៤០ ឆ្នាំ និង​លោកស្រី លី​ដ​មី​ឡា អាយុ ៣៧ ឆ្នាំ​បានចាប់ផ្តើម​ស្រឡាញ់គ្នា​ដោយសារ​ចូលចិត្ត​បាល់​ដូចគ្នា នៅពេល​ពួកគេ​បាន​ជួបគ្នា​នៅ​រង្គសាល​កីឡា​មួយ​ក្នុង​ទីក្រុង​ឆែ​ល​យ៉ា​ប៊ី​ន ប្រទេស​រុស្ស៊ី​អំឡុង​វើ​ល​ខាប់ ២០០២​។​

​ពួកគេ​បាន​រៀប​អាពាហ៍ពិពាហ៍​នៅ​២​ឆ្នាំក្រោយ ទោះបីជា​ប្តី​ប្រពន្ធ​នេះ​ជា​អ្នកគាំទ្រ​ក្លិប​គូប្រជែង​ក្នុង​ទីក្រុង​មូ​ស្គូ ហើយ​គាត់​ជា​អ្នកគាំទ្រ​ក្លិប Barcelona ខណៈដែល​នាង​ជា​អ្នកគាំទ្រ​ក្រុម Real Madrid ។​

​ដោយសារតែ​ក្តី​ស្រឡាញ់​របស់​អា​សេន​ចំពោះ​ម៉េ​ស​ស៊ី និង ក្តី​ស្រឡាញ់​របស់​ប្រពន្ធ​គាត់​ចំពោះ​រ៉ូ​ណា​ល់​ដូ ទើប​ធ្វើឱ្យ​ចំណងអាពាហ៍ពិពាហ៍​របស់​ពួកគេ​បាន​ឈានដល់​ទីបញ្ចប់​កាលពី​សប្តាហ៍​មុន​។ នេះ​បើតាម​សេចក្តីរាយការណ៍​របស់​វេ​ប​សាយ afi.ru​។​

​គាត់​និយាយថា គាត់​និង​ប្រពន្ធ​តែងតែ​និយាយ​ចម្អក​ដាក់គ្នា​ទៅវិញទៅមក​អំពី​ម៉េ​ស​ស៊ី និង រ៉ូ​ណា​ល់​ដូ ប៉ុន្តែ​វើ​ល​ខាប់​លើក​នេះ​ជាការ​ចម្អក​លើកចុងក្រោយ​រប​ស់​ពួកគេ​។

​លោក​អា​សេន​និយាយថា ការបង្ហាញ​ខ្លួន​ដ៏​ខកចិត្ត​របស់​អា​ហ្ស​ង់​ទីន​អំឡុង​វើ​ល​ខាប់​ឆ្នាំនេះ បាន​នាំឱ្យ​ប្រពន្ធ​គាត់​ចម្អក​ឱ្យ​ម៉េ​ស​ស៊ី​ខ្លាំងៗ​ពេក ធ្វើឱ្យ​គាត់​ស្ពឹក​មុខ​ទ្រាំលែងបាន​តទៅទៀត​។

​គាត់​និយាយថា គាត់​តែង​ធ្វើ​មិនដឹងមិនឮ​សម្តី​របស់​នាង ប៉ុន្តែ​នៅពេល​គាត់​កំពុង​អបអរ​គ្រាប់​បាល់​របស់​ម៉េ​ស​ស៊ី​ស៊ុត​ចូល​នី​ហ្សេ​រី​យ៉ា នាង​នៅតែ​និយាយ​ចម្អក​ថា​ម៉េ​ស​ស៊ី​លេង​អន់​ទៀត ដូច្នេះ​លែង​គ្នា​តែម្តងទៅ​ល្អ​ជាង​៕

ប្រភព៖ rasmeinews.com