ក្មេងម្នាក់ត្រូវបានកម្លាំងសមត្ថកិច្ចឃាត់ខ្លួន ខណៈកំពុងប៉ុនប៉ងរត់ពន្ធទូរស័ព្ទ អាយហ្វូន អេច(iPhone X) រាប់សិបគ្រឿងដែលមានតម្លៃសរុបជាង ៥០.០០០ ដុល្លារអាមេរិក ពីម៉ាកាវ ចូលចិនដីគោក។
យោងតាមមន្ត្រីគយចិនបានឱ្យដឹងថា ក្មេងប្រុសអាយុ ៩ ឆ្នាំដែលរស់នៅក្រុងហុងកុង ខាងលើនេះ បានរុំទូរស័ព្ទស្មាតហ្វូនចំនួន ១៤ គ្រឿងជុំវិញដងខ្លួន និង ២៦ គ្រឿងទៀតលាក់ក្នុងសាក់កាដូ ស្ពាយក្រោយ។
ក្មេងនេះបានសារភាពទាំងទឹកភ្នែកទឹកសម្បោរថា ម្តាយរបស់ខ្លួនបានបង្ខំឱ្យខ្លួនជញ្ជូនទូរស័ព្ទ ទាំងនេះ ហើយណាត់ជួបគ្នានៅឯម្ខាងទៀតនៃព្រំប្រទល់ក្នុងក្រុងជូហៃ (Zhuhai) ខេត្តគ័ងតុង (Guangdong)។
យោងតាមមន្ត្រីគយស្រុកកុងប៉ី (Gongbei) ក្រុងជូហៃ បានឱ្យដឹងថា សមត្ថកិច្ចបានសង្កេតឃើញ ក្មេងប្រុសម្នាក់ធ្វើដំណើរតែម្នាក់ឯងពីម៉ាកាវកាលពីថ្ងៃទី៤ ខែកក្កដា។ ដោយមានការសង្ស័យ ពួកគេក៏បានឃាត់កុមារឈ្មោះ លី (Li) នេះឆែកឆេរ ក៏ស្រាប់តែភ្ញាក់ព្រើត។
បន្ទាប់ពីត្រូវមន្ត្រីគយឃាត់ខ្លួន ក្មេងប្រុសរូបនេះមានការភិតភ័យយ៉ាងខ្លាំង។ ក្មេងនេះបានស្រែកយំ ហើយមិនព្រមប្រាប់ពីកន្លែងដែលខ្លួនណាត់ជួបជាមួយម្តាយឡើយ ដោយខ្លាចម្តាយត្រូវ ជាប់ពន្ធនាគារ។
សូមបញ្ជាក់ថា កន្លងមកម្តាយរបស់ក្មេងនេះធ្លាប់ជាប់ឃុំរួចមកហើយពីបទរត់ពន្ធ។ លើកនេះ គេមិនប្រាកដថាតើម្តាយរបស់ក្មេងនេះនឹងប្រឈមការចោទប្រកាន់ឬយ៉ាងណាទេ ខណៈសមត្ថកិច្ច កំពុងស៊ើបអង្កេតបន្ថែមទៀត៕
ប្រភព៖ rasmeinews.com