រុក្ខជាតិមួយប្រភេទឈ្មោះ ខាត (KHAT) ដែលក្រសួងសុខាភិបាលអះអាងថា រុក្ខជាតិនេះ មានផ្ទុកនូវសារធាតុញៀនប្រភេទ Cathinone និង Cathine ត្រូវបានហាមឃាត់នាំចេញ-នាំចូល និងប្រើប្រាស់ ក្នុងព្រះរាជាណាចក្រកម្ពុជា។
រដ្ឋមន្ត្រីក្រសួងសុខាភិបាល ឯកឧត្តម ម៉ម ប៊ុនហេង បានចេញប្រកាសមួយស្តីពី ការហាមឃាត់ការនាំចេញ នាំចូល ប្រភេទនេះ ហើយបើមានអ្នកល្មើសត្រូវផ្ដន្ទាទោសតាមទោសបទប្បញ្ញត្តិដែលមានចែងក្នុងច្បាប់ស្តីពី ការត្រួតពិនិត្យគ្រឿងញៀន។
កន្លងមករុក្ខជាតិខាតនេះ ត្រូវបានអាជ្ញាធរជាតិប្រយុទ្ធប្រឆាំងនឹង គ្រឿងញៀន ចាត់ទុកជាគ្រឿងញៀនប្រភេទថ្មីមួយទៀតនាំចូលពីប្រទេស អេត្យូពី ទើបមានវត្តមាននៅកម្ពុជា ដែលវាមានផ្ទុកសារធាតុ ធ្វើឲ្យប៉ះពាល់ដល់ប្រព័ន្ធប្រសាទរបស់មនុស្ស។
កាលពីថ្ងៃទី២៦ ខែមិថុនា ឆ្នាំ២០១៨គណៈកម្មការដុតបំផ្លាញគ្រឿងញៀនក៏បានធ្វើដុតបំផ្លាញស្លឹករុក្ខជាតិខាត (KHAT) ប្រមាណជាង ៣តោន ជាមួយនឹងគ្រឿងញៀនផ្សេងទៀតនៅកោះពេជ្រ ប្រមាណជាង៦៤គីឡូក្រាមផងដែរ៕
ប្រភព៖ sabay.com.kh