ភ្ញាក់ផ្អើល ហើយក៏ឆ្ងល់ណាស់មែនទេហេតុអ្វីទើបនៅតែទម្ងន់ខ្លាំងទោះបីជាមានរបបអាហារត្រឹមត្រូវ និងធ្វើលំហាត់ប្រាណជាប្រចាំ? (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) នោះក៏ព្រោះតែមិនមែនកត្តារបបអាហារនិងកង្វះ
លំហាត់ប្រាណប៉ុណ្ណោះទេដែលនាំឱ្យធាត់។ ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីមូលហេតុស្មានមិនដល់មួយចំនួនដែលបង្កបញ្ហាកើនទម្ងន់លើសលប់ ៖
១. ទទួលទានទឹកមិនបានគ្រប់គ្រាន់
រាល់កោសិកាដែលខ្វះជាតិទឹកមិនមានថាមពលគ្រប់គ្រាន់ឡើយ ហើយអ្នកងាយនឹងឆាប់មានអារម្មណ៍ឃ្លាន រួចចាប់ផ្ដើមទទួលទានកាន់តែច្រើនជាងមុនទាំងដែលការពិតអ្នកគ្រាន់តែស្រេកទឹក។
២. ប្រព័ន្ធរំលាយអាហារដំណើរការមិនបានល្អ
នោះក៏ព្រោះតែប្រព័ន្ធរំលាយអាហារដំណើរការមិនល្អគ្មានប្រសិទ្ធភាពខ្ពស់ក្នុងការដុតបំផ្លាញខ្លាញ់ឡើយដែលនាំឱ្យពិបាកក្នុងការស្រកទម្ងន់។ ដូច្នេះដើម្បីជាការប្រសើរចូរថែរក្សាសុខភាពប្រព័ន្ធរំលាយអាហារឱ្យបានល្អដោយរួមបញ្ចូលជាតសសៃបន្ថែមក្នុងរបបអាហារប្រចាំថ្ងៃ និងកុំភ្លេចទទួលទានអាហារប្រូបាយអូទិកដូចជាយ៉ាអួរជាដើម។
៣. គេងមិនគ្រប់
អត្ថប្រយោជន៍ដ៏ប្រសើរបំផុតមួយទៀតនៃការគេងបានពី ៧ ទៅ ៩ ម៉ោងរាល់យប់ គឺចៀសផុតពីជំងឺធាត់ជ្រុល។ កង្វះនៃការគេងអាចបង្កបញ្ហាអតុល្យភាពនៃអ័រម៉ូននិងចំណង់អាហារ។ នៅពេលគេងមិនបានគ្រប់គ្រាន់រាងកាយនឹងមិនអាចផលិតអ័រម៉ូន ghrelin (ទទួលខុសត្រូវរំញោចការឃ្លាន)
និងអ័រម៉ូន leptin (ទប់ស្កាត់ចំណង់អាហារ) ត្រឹមត្រូវដើម្បីអាចអោយខួរក្បាលបានដឹងថាយើងឆ្អែតក្រោយទទួលទានរួចឡើយ។ ម្យ៉ាងវិញទៀតអតុល្យភាពនៃអ័រម៉ូនក្នុងរាងកាយជាមូលហេតុគួរឱ្យកត់សម្គាល់មួយនៃការកើនទម្ងន់ខុសប្រក្រតី។
៤. ស្ត្រេស ឬតានតឹងក្នុងអារម្មណ៍ខ្លាំងពេក
នោះក៏ព្រោះតែភាពស្ត្រេសនាំឱ្យមានការបញ្ចេញអ័រម៉ូន cortisol ច្រើនដែលបង្កើនការស្តុកទុកជាតិខ្លាញ់ក្នុងរាងកាយ។ ដូច្នេះចូរព្យាយាមគ្រប់គ្រងភាពតានតឹងរបស់អ្នក។
៥. ការទទួលទានថ្នាំមួយចំនួន
មានថ្នាំច្រើនប្រភេទណាស់ដែលអាចនាំឱ្យអ្នកកើនទម្ងន់ដោយស្មានមិនដល់។ ថ្នាំទាំងនោះរួមបញ្ចូលទាំង steroids, ថ្នាំអ័រម៉ូន, ថ្នាំប្រភេទ beta blockers, ថ្នាំជំងឺមហារីកសុដន់, ថ្នាំប្រឆាំងនឹងការប្រកាច់ និងថ្នាំពន្យារកំណើត។ មួយចំនួននៃថ្នាំទាំងនេះអាចជះឥទ្ធិពលលើកម្រិតនៃអ័រម៉ូន ខណៈដែលខ្លះទៀតពន្យឺតការដុតរំលាយអាហារ ហើយបង្កផលប៉ះពាល់លើទម្ងន់ ឬចំណង់អាហារគួរឱ្យកត់សម្គាល់៕