យ៉ាអួអាចបង្កើតឡើងដោយទឹកដោះគោប្រភេទខុសៗគ្នាដូចជា ទឹកដោះគោមានជាតិខ្លាញ់សុទ្ធ ទឹកដោះគោស្រស់ ទឹកដោះពពែ ឬទឹកដោះចៀម។ វាផ្ទុកទៅដោយមេរោគមានជីវិតជាច្រើនដែលគេស្គាល់ថា ជាបាក់តេរីល្អ ឬហៅថា Probiotics ដែលអាចជួយដល់ប្រព័ន្ធភាពស៊ាំបានយ៉ាងល្អ។ មានប្រយោជន៍ច្រើនណាស់ដែលជាប់ទាក់ទងជាមួយនឹងយ៉ាអួដែលមនុស្សជាច្រើនមិនបានដឹងឡើយ។ មែនហើយ នេះគឺជាការបន្ថែមដ៏ល្អមួយទៅលើរបបអាហារអ្នក ជាពិសេសនៅពេលដែលអ្នកកំពុងតែព្យាយាមសម្រកទម្ងន់។ ខាងក្រោមនេះគឺជាអត្ថប្រយោជន៍ ៥យ៉ាងនៃការញ៉ាំយ៉ាអួរចំពោះសុខភាព៖
ផ្តល់ជីវជាតិដល់សក់
យ៉ាអួផ្ទុកទៅដោយសារធាតុផ្តល់សំណើមដែលអ្នកអាចប្រើលើសក់ដើម្បីទទួលបានសុខភាពបែបធម្មជាតិរបស់វាមកវិញបាន។ របៀបដែលយើងយកចិត្តទុកដាក់ទៅលើសក់សព្វថ្ងៃនេះអាចធ្វើឲ្យវាមើលទៅស្ងួត និងខូចខាតបាន។ ដោយសារតែយើងបានប្រើប្រាស់សារធាតុគីមីជាច្រើនទៅលើវា ឬប្រើឧបករណ៍ធ្វើឲ្យវាខូចដែរ។ យ៉ាអួមានវីតាមីន B5 យ៉ាងច្រើនដែលអាចផ្តល់ជីវជាតិដល់សក់នៅពេលលាបវាលើសរសៃសក់។
សម្រួលដល់កូឡេស្តេរ៉ុលក្នុងឈាម
យ៉ាអួរមាន Probiotics ដែលអាចជួយបញ្ចុះកូឡេស្តេរ៉ុលអាក្រក់ពីក្នុងឈាម។ កាលណាកូឡេស្តេរ៉ុលនេះឡើងខ្ពស់ វានឹងនាំឲ្យកើតជាចំងឺក្រិនរឹងសរសៃឈាម ឬបញ្ហាសរសៃឈាមបេះដូងបាន។ ការញ៉ាំយ៉ាអួជាទៀងទាត់អាចជួយការពារបេះដូងពីជំងឺដែលបង្កឡើងដោយកូឡេស្តេរ៉ុលអាក្រក់បាន។
ការពារអ្នកពីការបង្ករោគផ្សិត
ស្រ្តីគឺងាយនឹងមានការបង្ករោគដោយមេរោគផ្សិត Candida ណាស់ ជាពិសេសនៅពេលដែលមានអតុល្យភាពមជ្ឈដ្ឋានក្នុងពោះវៀនតែម្តង។ នៅពេលរឿងនេះកើតឡើង អ្នកនឹងត្រូវការធ្វើរឿងឲ្យបានលឿនតាមតែអាចធ្វើទៅបានដើម្បីរក្សមជ្ឈដ្ឋានក្នុងពោះវៀនមានតុល្យភាពវិញ ហើយក៏សម្រួលដល់កម្រិត pH ក្នុងឈាមដែរ។ ដើម្បីលុបបំបាត់ការបង្ករោគដោយមេរោគផ្សិតនៅទ្វារមាស យកល្អគួរតែបន្ថែមយ៉ាអួរទៅក្នុងរបបអាហាររបស់អ្នកផងទៅ។
ជួយដល់ការសម្រកទម្ងន់
យ៉ាអួត្រូវបានគេស្គាល់ច្បាស់ទៅលើប្រូតេអ៊ីនរបស់វាដែលអ្នកអាចទទួលបានប្រហែល ៦ក្រាមនៅពេលញ៉ាំបាន ១០០ក្រាម។ រាងកាយត្រូវការប្រូតេអ៊ីនដើម្បីបំពេញមុខងារជាច្រើនដូចជា សម្រាប់ការរំលាយអាហារ ការលូតលាស់របស់សាច់ដុំ និងគ្រប់គ្រងការឃ្លានអាហារផងដែរ។ ការញ៉ាំយ៉ាអួអាចធ្វើឲ្យក្រពះបញ្ជូនសញ្ញាទៅខួរក្បាលថា អ្នកបានញ៉ាំឆ្អែតហើយ ដែលរឿងនេះនឹងជួយបន្ថយការញ៉ាំកាឡូរីកាន់តែច្រើនថែមទៀត។
ឆាប់ស្រួលបួលពីការមានរបួស
អ្នកខ្លះយល់ថា រយៈពេលនៃការមានរបួសពួកគេក្រោយពីហាត់ប្រាណរួចបែរជាកាត់បន្ថយទៅវិញ។ មែនហើយ រឿងនេះមិនមែនជាបញ្ហាឡើយបើសិនជាអ្នកញ៉ាំយ៉ាអួក្រោយពីហាត់ប្រាណរួច។ ហេតុផលមួយនៅពីក្រោយរឿងនេះគឺថា យ៉ាអួមានប្រូតេអ៊ីនច្រើនណាស់ដែលអាចមានប្រយោជន៍ក្នុងការជួសជុលសាច់ដុំដែលខូចខាត៕