អ័រម៉ូនគឺជាសារធាតុគីមីដែលដើរតួនាទីខុសៗគ្នាជាច្រើន។ វាត្រូវបានផលិត និងបញ្ចេញដោយក្រពេញ និងសរីរាង្គជាច្រើនក្នុងខ្លួនដូចជា ក្រពេញទីរ៉ូអ៊ីន ក្រពេញលើតម្រងនោម ពងស្វាស ឬក្រពេញអូវ៉ែជាដើម ដែលវាត្រូវធ្វើការជាមួយគ្នាទាំងអស់ដើម្បីផ្តល់នូវតុល្យភាពត្រឹមត្រូវ។ ជាអកុសល្យ មានរឿងច្រើនណាស់ដែលអាចធ្វើឲ្យអតុល្យភាពដល់អ័រម៉ូនទាំងនេះបានដូចជា ការចាស់ទៅតាមអាយុ របបអាហារ និងរបៀបរស់នៅ។ វាក៏អាចជាប់ទាក់ទងនឹងការមករដូវ ការមានផ្ទៃពោះ និងពេលរ៉ាំងរដូវផងដែរ។
អ្វីដែលជាដំណឹងល្អនោះគឺថា យើងមានមធ្យោបាយច្រើនដែលអាចជួយរក្សាតុល្យភាពអ័រម៉ូនក្នុងខ្លួនឡើងវិញតាមបែបធម្មជាតិ។
បន្ថែមជាតិប្រូតេអ៊ីនគ្រប់គ្រាន់ក្នុងរបបអាហារ
មនុស្សគ្រប់គ្នាដឹងហើយថា ប្រូតេអ៊ីនគឺជារបស់សំខាន់សម្រាប់សាងសាច់ដុំ។ តើអ្នកមានដឹងទេថា វាមាននាទីច្រើនណាស់ដែលប្រូតេអ៊ីនអាចធ្វើបាន។ រឿងមួយក្នុងចំណោមនោះគឺវាជាអ្នកផលិតអ័រម៉ូន។ ប្រូតេអ៊ីនអាចយកបានពីសាច់សត្វ និងរុក្ខជាតិ។
ញ៉ាំត្រីសម្បូរខ្លាញ់ជាទៀងទាត់
អ្វីដែលធ្វើឲ្យត្រីសម្បូរខ្លាញ់មាននោះគឺ អូមេហ្គាបី ដែលវាជាខ្លាញ់ល្អចំពោះសុខភាព។ ខ្លាញ់ប្រភេទនេះល្អបំផុតក្នុងការរក្សាតុល្យភាពរបស់អ័រម៉ូន។ ក្រៅពីនេះវាអាចគ្រប់គ្រងការរលាកបានថែមទៀតផង។ បើសិនជាអ្នកញ៉ាំអាហារបួស អ្នកក៏អាចទទួលបានអូមេហ្គាបីបានតាមរយៈការញ៉ាំគ្រាប់ផ្លែឈើ ឬផ្លែប័រ។
ហាត់ប្រាណទៀងទាត់
វាមិនមែនជារឿងអាថ៌កំបាំងទេដែលថា ការហាត់ប្រាណទៀងទាត់គឺជារឿងល្អជួយដល់ទំហំចង្កេះ សុខភាពបេះដូង និងសន្លាក់។ ប៉ុន្តែតើអ្នកមានដឹងទេថា វាក៏ជួយជម្រុញដល់តុល្យភាពធម្មតារបស់អ័រម៉ូនផងដែរ។ យ៉ាងណាមិញ វាគឺជារឿងសំខាន់ដែលត្រូវកត់សម្គាល់ថា អ្នកគួរតែហាត់ប្រាណគ្រប់ចំនួនដែរ ព្រោះការដែលហាត់ប្រាណតិចពេក និងច្រើនពេកអាចមានបញ្ហាវិញ។ យកល្អគួរតែពិគ្រោះជាមួយគ្រូពេទ្យអំពីគម្រោងនៃការហាត់ប្រាណ ជាពិសេសនៅពេលដែលអ្នកមានជំងឺ ឬធ្លាប់តែរស់នៅបែបស៊ីដេកៗ។
បន្ថយស្រ្តេស និងគេងគ្រប់គ្រាន់
ហេតុផលមួយក្នុងចំណោមហេតុផលជាច្រើនដែលមនុស្សជាច្រើនមានបញ្ហាអតុល្យភាពអ័រម៉ូននាពេលសព្វថ្ងៃនេះគឺស្រ្តេស ដែលវាកំពុងតែកើតឡើងយ៉ាងខ្លាំងក្នុងយុគ្គសម័យដ៏ទំនើបមួយនេះ។ បើសិនជាអ្នកចង់រក្សាតុល្យភាពអ័រម៉ូនល្អវិញ យកល្អគួរតែកាត់បន្ថយស្រ្តេសឲ្យបានច្រើន និងព្យាយាមធ្វើសកម្មភាពផ្សេងៗដែលអាចបន្ថយស្រ្តេសបាន៕