កុំរំលង! ចំណុចសំខាន់ ៦ យ៉ាងអំពីក្ដីស្រឡាញ់ដែលឪពុកម្ដាយគ្រប់រូបគួរប្រាប់កូនៗអោយដឹង

ក្ដីស្រឡាញ់ជាផ្នែកសំខាន់បំផុតមួយក្នុងជីវិតមនុស្សគ្រប់រូប ដូច្នេះហើយទើបឪពុកម្ដាយចាំបាច់គួរបង្រៀន ឬពន្យល់កូនៗអំពីការពិតមួយចំនួនពាក់ព័ន្ធក្ដីស្រឡាញ់។ (អាន ៖ ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?) ថ្ងៃនេះវេបសាយសុខភាព Health.com.kh នឹងបង្ហាញអោយដឹងពីចំណុចសំខាន់បំផុតមួយចំនួនអំពីក្ដីស្រឡាញ់ដែលឪពុកម្ដាយគូរបង្រៀនដល់កូនតូចៗ ៖

១. នៅក្នុងសេចក្ដីស្រឡាញ់ គឺត្រូវមានការផ្ដល់អោយទៅវិញទៅមក

ជាធម្មតាក្មេងៗតែងទទួលបានការស្រឡាញ់និងយកចិត្តទុកដាក់ពីឪពុកម្ដាយ។ ប៉ុន្តែពួកគេក៏ត្រូវយល់ផងដែរថាសេចក្ដីស្រឡាញ់គួរត្រូវបានផ្ដល់អោយគ្នាទៅវិញទៅមក។ នេះមានន័យថាមិនមែនមានតែភាគីម្ខាងជាអ្នកផ្ដល់អោយ ហើយម្ខាងទៀតចាំតែទទួលឡើយ។ ប្រសិនបើគេទទួលបានការស្រឡាញ់និងយកចិត្តទុកដាក់ពីនរណាម្នាក់ខ្លាំងប៉ុណ្ណា ពួកគេក៏គួរផ្ដល់ការស្រឡាញ់ដល់អ្នកនោះវិញដែរ។ 

២. ស្រឡាញ់អ្នកដទៃមិនមែនមានន័យថាត្រូវស្រឡាញ់ខ្លួនឯងតិចជាងឡើយ

កូនៗរបស់អ្នកត្រូវដឹងថានៅពេលពួកគេស្រឡាញ់នរណាម្នាក់ វាមិនមែនមានន័យថាពួកគេចាំបាច់ត្រូវលះបង់គ្រប់យ៉ាងរបស់ខ្លួនឯង ហើយស្របតាមមនុស្សដែលពួកគេស្រឡាញ់រហូតទេ។ ពិតណាស់ការលះបង់និងស្របតាមគ្នា គឺជាចំណុចសំខាន់ក្នុងការរក្សាទំនាក់ទំនង ប៉ុន្តែពួកគេក៏មិនគួរបន្ថយការស្រឡាញ់ខ្លួនឯងដើម្បីតែនរណាម្នាក់ឡើយ។ ក្មេងៗអាចរៀន ឬដឹងពីចំណុចនេះដោយមើលលើទំនាក់ទំនងរបស់ឪពុកម្ដាយពួកគេ។

៣. ក្នុងក្ដីស្រឡាញ់ ការគោរពគឺចាំបាច់បំផុត

ក្មេងៗក៏គួរដឹងផងដែរថាការគោរពនិងការស្រឡាញ់ គឺដើរទន្ទឹមគ្នា។ ពួកគេអាចទទួលបានការគោរពពីអ្នកដទៃ ហើយផ្ដល់អោយអ្នកនោះវិញនូវការគោរពដូចគ្នា។ ឪពុកម្ដាយគួរបង្រៀនកូនអោយដឹងថាការស្រឡាញ់ ឬស្នេហាដែលមិនមានការគោរព គឺច្រើនតែជួបបញ្ហានិងគ្មានសុភមង្គលឡើយ។

៤. ការស្រឡាញ់ខ្លួនឯង គឺជាប្រភេទនៃក្ដីស្រឡាញ់ដែលសំខាន់បំផុត

ក្មេងៗចាំបាច់ត្រូវដឹងអំពីភាពខុសគ្នានៃពាក្យអត្មានិយមនិងការស្រឡាញ់ខ្លួនឯង។ ពួកគេមិនគួរផ្លាស់ប្ដូរខ្លួនឯងដើម្បីអោយដូចនរណាម្នាក់ ឬគ្រាន់តែដើម្បីទទួលបានការស្រឡាញ់ពីគេនោះទេ។ ពួកគេគួរចេះទទួលស្គាល់ ឬទទួលយកខ្លួនឯងជាខ្លួនឯង។

៥. ពេលខ្លះការស្រឡាញ់មិនគង់វង្សរហូតឡើយ

ក្មេងៗគួរយល់ដែរថាពេលខ្លះការបញ្ចប់ទំនាក់ទំនង ហើយកាត់ចិត្ត គឺជាជម្រើសដ៏ប្រសើរបំផុត។ ពួក
គេគួរដឹងថាគ្រប់ពេលដែលបានចំណាយក្នុងទំនាក់ទំនងមួយ គឺមិនបានខ្ជះខ្ជាយឥតប្រយោជន៍។ 

៦. ក្ដីស្រឡាញ់យូរអង្វែង គឺទាមទារការខិតខំប្រឹងប្រែង

ក្ដីស្រឡាញ់ គឺទាមទារការប្រឹងប្រែងថែរក្សាពីភាគីទាំងសងខាងទើបអាចយូរអង្វែង។ ក្ដីស្រឡាញ់ ឬស្នេហាដែលអាចឋិតឋេររហូត គឺនឹងកើតមាន ប្រសិនបើភាគីទាំងសងខាងព្យាយាមអស់ពីសមត្ថភាពដើម្បីវា។ ឪពុកម្ដាយគួរពន្យល់កូនៗអំពីចំណុចនេះដើម្បីពួកគេអាចទទួលបានបទពិសោធន៍ល្អនៅ
ពេលអនាគត៕