សិល្បៈការិនី​របស់​កូរ៉េ​ម្នាក់​ដែល​តែង​បង្ក​បរិយាកាស​រីករាយ​ដល់​មហាជន​ជាច្រើន​ បាន​ត្រៀម​ខ្លួន​ជាពិសេស​សម្រាប់​មង្គលការ​របស់​ខ្លួន​ដែល​នឹង​មកដល់​ក្នុង​ពេល​ឆាប់ ដោយ​ថែម​ទាំង​ប្ដេជ្ញា​សម្រក​រាង​ឲ្យ​បាន​ទៀត។

តារា​កំប្លែង​ Hong Yoon Hwa បាន​បង្ហោះ​ដំណើរ​ការ​ថែរាង​លើ​ Instagram ហើយ​ថែម​ទាំង​បាន​ទទួល​ការ​ចាប់​អារម្មណ៍​គួរសម​ពី​អ្នក​តាមដាន​របស់​នាង។ មិន​យូរ​ប៉ុន្មាន​ថ្ងៃ​សំខាន់​ក្នុង​មួយ​ជីវិត​របស់​ Yoon Hwa នឹង​កាន់​ដៃ​មិត្ត​ប្រុស​របស់​នាង​លោក​ Kim Minki ចូលរោងការនៅ​ថ្ងៃ​ទី​ ១៧ ខែវិច្ឆិកា​ខាង​មុខ។

ជាមួយ​គ្នា​នោះ​ដើម្បី​ក្លាយ​ខ្លួន​ជា​ក្រមុំ​ដ៏​ស្រស់​ស្អាត​ តារា​កំប្លែង​សម្បូរ​សាច់​រូបនេះ​ ក៏​មាន​គម្រោង​សម្រក​ទម្ងន់​ឲ្យ​បាន​ ៣០គីឡូ​ក្រាម​ដែរ។

បើ​ធៀប​ទៅ​កាល​ពី​មាន​សាច់​ទ្រលុកទ្រលន់​ និង​មុខ​ប៉ោង​សុទ្ធ​តែ​សាច់​ពីមុន​ និង​បច្ចុប្បន្ន​ ឃើញ​ថា​ Yoon Hwa ប្រែ​ប្រួល​ខ្លះ​ហើយ ​ហើយ​សំខាន់​នាង​កាន់​តែ​ស្រស់ស្រាយ​ជាងមុន​ទៀត។ ពេល​នេះ​ នាង​ក៏​កំពុង​បន្ត​យុទ្ធនាការ​សម្រក​រាង​ ដើម្បី​សម្រេច​គោល​ដៅ​ឲ្យបាន៕

ប្រភព៖ sabay.com.kh