គ្រប់គ្នាដឹងហើយថា អាហារដែលមានជាតិសរសៃខ្ពស់គឺជាអាហារដ៏ល្អសម្រាប់ព្យាបាលការទល់លាមក ហេតុដូច្នេះហើយ ការបញ្ចូលអាហារទាំងនេះទៅក្នុងរបបអាហារគឺជារឿងដ៏ល្អមួយបើសិនជាអ្នកមានបញ្ហាមិនសូវបន្ទោបង់ទៀងទាត់ ឬបន្ទោបង់តិចជាង ៣ដក្នុងមួយសប្តាហ៍។ (អាន:ស្បែកកូនរបស់អ្នកនឹងស្អាតហើយមិនរមាស់បើធ្វើតាមវិធីនេះ តើកូនស្រីរបស់អ្នកចេះតែរមាស់ស្បែកមែនទេ?)តើអ្នកមានដឹងទេថា មានអាហារមួយចំនួនក៏អាចធ្វើឲ្យទល់លាមកបានដែរ។ បើសិនជាអ្នកជាមនុស្សដែលងាយនឹងមានបញ្ហារំលាយអាហារនោះ ការអានអត្ថបទនេះនឹងមានប្រយោជន៍ចំពោះអ្នកជាមិនខាន ព្រោះខ្ញុំនឹងបង្ហាញអាហារមួយចំនួនដែលត្រូវបានគេរកឃើញថា អាចបង្កជាការទល់លាមកជាងការព្យាបាលការទល់លាមក៖
ចេកខ្ចី
ប្រហែលជាអ្នកធ្លាប់ដឹងហើយថា ការញ៉ាំផ្លែចេកគឺជាវិធីព្យាបាលការទល់លាមកដ៏ល្អមួយ ហើយអ្វីដែលកាន់តែអស្ចារ្យថែមទៀតនោះគឺថា ផ្លែចេកក៏អាចជួយព្យាបាលការរាករូសបានដែរ។ ជាអកុសល ការញ៉ាំចេកខ្ចីអាចបង្កជាការទល់លាមកបាន។ នេះដោយសារតែវាផ្ទុកទៅដោយជាតិអាមីដុងមួយប្រភេទដែលពិបាកដល់ការធ្វើចលនារបស់ពោះវៀន ព្រមទាំងសារធាតុ Tannins ដែលទៅបន្ថយចលនារបស់អាហារក្នុងពោះវៀន។
ទឹកដោះគោ
តាមការសិក្សាបានឲ្យដឹងថា មានមនុស្សជាច្រើនជួបបញ្ហាទល់លាមកដោយសារតែការញ៉ាំទឹកដោះគោ និងផលិតផលធ្វើពីទឹកដោះគោគ្រប់ប្រភេទ។ រឿងនេះត្រូវបានគេសង្ស័យថា រាងកាយមានប្រតិកម្មនឹងប្រូតេអ៊ីនដែលមានក្នុងទឹកដោះគោ និងអាហារផ្សេងៗទៀតដូចជា ប័រ យ៉ាអួរ និងការ៉េមតែម្តង។ ប៉ុន្តែវាគឺជារឿងខុសគ្នាដាច់សម្រាប់អ្នកដែលមានបញ្ហា Lactose Intolerant។ មានន័យថា ឲ្យតែញ៉ាំទឹកដោះគោ និងផលិតផលធ្វើពីទឹកដោះគោដឹងតែរាកតែម្តង។
អាហារលឿន
គ្មានអ្វីអាចធ្វើឲ្យអ្នកទល់លាមកលឿនជាងការញ៉ាំអាហារលឿនឡើយ។ នេះដោយសារតែវាមានជាតិសរសៃទាបបំផុត។ យកល្អគួរតែចាំថា មនុស្សមួយចំនួនប្រហែលជាមានបញ្ហារាករូសច្រើនជាងទល់លាមកក្រោយពីញ៉ាំអាហារលឿនរួច ព្រោះអាហារទាំងនេះមានជាតិខ្លាញ់ងខ្ពស់ ដែលជំរុញដល់ការរាករូស និងបង្កជាបញ្ហាផ្លូវរំលាយអាហារផ្សេងៗទៀតដូចជា ឈឺពោះ និងផោមច្រើន។
កាហ្វេ និងគ្រឿងស្រវឹង
តើអ្នកជាមនុស្សដែលញ៉ាំគ្រឿងស្រវឹង ឬកាហ្វេច្រើនៗដែរទេ? បើសិនជាចឹងមែន គួរតែកុំភ្ញាក់ផ្អើលអីបើសិនជាអ្នកឧស្សាហ៍មានអាការៈទល់លាមកនោះ។ កាហ្វេ និងគ្រឿងស្រវឹងសុទ្ធតែមានសារធាតុបញ្ចុះទឹកនោម។ វាគឺជាចំណេះដឹងទូទៅមួយដែលមនុស្សយើងគួរតែញ៉ាំទឹកឲ្យបានគ្រប់គ្រាន់ដើម្បីទប់ស្កាត់ការទល់លាមក។ (អាន:ថ្នាំងងុយគេង ពេលអ្នកគួរប្រើ)ហេតុដូច្នេះហើយ យកល្អគួរតែញ៉ាំកាហ្វេ និងគ្រឿងស្រវឹងក្នុងកម្រិតមធ្យមបានហើយ។ មួយវិញទៀត អ្នកគួរតែញ៉ាំទឹកឲ្យបានយ៉ាងហោចណាស់ ២លីត្រក្នុងមួយថ្ងៃផង៕